Қазақстандық қылмыскерлерге бас сауғалап қашатын өріс тарылып барады. Сенат Спикері Мәулен Әшімбаевтың төрағалығымен палата отырысы өтті. Онда сенаторлар Қазақстан мен Солтүстік Македония арасындағы екіжақты ынтымақтастықты нығайтуға ықпал ететін бірқатар шартты ратификациялады. Бұдан былай екі мемлекет бір-біріне іздеуде жүрген азаматтарын ұстап беретін болды.
Мұндай норма «Қазақстан мен Солтүстік Македония арасындағы адамдарды ұстап беру туралы шартты ратификациялау туралы» заңда жазылған. Сондай-ақ бұл келісімде ұстап беруге, бас тартуға, ұстап беруді кейінге қалдыруға және рәсімді оңайлатуға негіз болатын ережелер де қамтылған. Отырыс барысында қабылданған тағы бір құжат – «Қазақстан мен Солтүстік Македония арасындағы сотталған адамдарды беру туралы шартты ратификациялау туралы» заң. Ол екі ел арасындағы құзыретті органдардың өзара іс-әрекетіне және сотталған адамдарды беру туралы келісім жасауға мүмкіндік береді. Құжатта экстрадициялау, ақпарат алмасу, сотталған адамдарды жеткізу шарттары жазылған. Бұдан бөлек, сотталған адамдарды беру кезіндегі шығындарға байланысты нормалар да қарастырылған. Сонымен қатар сенаторлар қос мемлекет арасында қылмыстық істер бойынша өзара құқықтық көмектің барлық ұйымдастырушылық-құқықтық тетігін реттеу және іске асыру үшін «Қазақстан мен Солтүстік Македония арасындағы қылмыстық істер бойынша өзара құқықтық көмек туралы шартты ратификациялау туралы» заңды құптап, Президенттің қол қоюына бағыттады. Құжаттың кейбір нормалары банк шоттары мен қаржылық ақпараттарды анықтау, қылмыстық істер туралы құжаттарды, материалдарды немесе заттарды және ақпараттарды алмасу мәселелеріне арналған. Үш заң бойынша пікір білдірген Сенат Төрағасы олардың ел азаматтарының құқықтарын қорғауда маңызы зор екенін айтты. – Бүгін қабылданған заңдар Қазақстан мен Солтүстік Македония арасындағы құқық қорғау саласындағы ынтымықтастықты дамытуға бағытталған. Олар қылмыскерлерді жауапкершілікке тартудың әртүрлі кезеңін қамтиды және қылмыспен күресті күшейту үшін мемлекетаралық қатынастардың құқықтық негіздерін қалыптастырады. Соған сәйкес, қылмыстарды тергеу процесінде жан-жақты көмек көрсету, қылмыскерлерді ұстау және оларды экстрадициялау, сотталған адамдарды беру сияқты өзара іс-әрекеттер қарастырылған. Бұл заңның үстемдігін қамтамасыз етеді. Сондай-ақ азаматтарымыздың құқықтарын қамтамасыз етуге мүмкіндік береді, – деді Мәулен Әшімбаев. Қазақстанның құқық қорғау қызметтерінің ақпаратынша, қазір екі ел арасында ұстап беруге жататын азаматтар жоқ. Жалпы, еліміз бұған дейін 30-ға жуық мемлекетпен осындай шарт жасасқанын айта кеткен жөн. Шетелдерде 922 қазақстандық жазасын өтеп жатыр.Елдос СЕНБАЙ