Жетісу өңіріндегі облыстық мәслихат депутаттары аймақтағы қайырымдылыққа қатысты шаралардың бел ортасынан табылып, елдің мұқтаждығын түгендеуге шамалары жеткенше атсалысуда. Облыстық мәслихаттың хатшысы Жанболат Жөргенбаев журналистермен жолыққанда, халық қалаулыларының өңірдегі кез келген жақсы жаңалықтың жаршысы болып жүргенін айта келе, депутаттардың 3 мың адамға 87 578 500 теңге көлемінде қайырымдылық жасағанына тоқталды.
«Ел Тәуелсіздігінің 30 жылдығы, Жамбыл Жабаевтың 175 жылдығы, Мұқағали Мақатаевтың 90 жылдығы және Талдықорған қаласының облыс орталығы атанғанына 20 жыл толуы құрметіне орай облыстық, қалалық және аудандық мәслихат депутаттары қайырымдылық және тағы да басқа ізгі шаралар ұйымдастыруда. Басты назарды індет кезінде халықтың әлеуметтік қолдауды қажет ететін тобындағылардың қиналып қалмауына аударып отырмыз. Депутаттар жыл басынан бері баспанасыз қалған екі отбасына тұрғын үй тарту етіп, көпбалалы, аз қамтылған отбасыларға, жетімдер мен зейнеткерлерге қолдан келген көмектің барлығын көрсетіп жатыр. Қыс айларында көмір түсіріп берсе, қазіргі кезде де тұрақты түрде азық-түлікпен көмектесті. Денсаулық сақтау саласына мүмкіндігінше қолдау көрсетіп жатыр», – дейді облыстық мәслихаттың хатшысы. Денсаулық сақтау саласын қолдау демекші, облыстық мәслихаттың депутаты Серік Ақсубаевтың COVID-19 індетіне байланысты осы салаға 10 миллион теңгенің, Елдос Үшкемпіровтың 365 500 теңге көмек көрсеткені басқаларға үлгі боларлық қарекет екені айдан анық. Бағдаулет Үстенов, Жалғасқан Дөнбаев, Жанна Жазықбаева, Сұлтан Нұрдәулетов сынды депутаттар да қасиетті Рамазан айында жерлестеріне шамалары жеткенше жәрдем көрсетуде. Жанболат Әкебайұлының айтуынша, облыстық мәслихат жыл соңына дейін 8 сессия өткізуді жоспараған. Бүгінгі күнге дейін 3 кезекті, 1 кезектен тыс сессия ойдағыдай өтіп, маңызды деп саналатын 28 шешім шығарылған. Облыстық мәслихатта тұрғын үй, ауыл шаруашылығы, жер қатынастары, ветеринария, экономика, индустриялық-инновациялық, денсулық сақтау және дін істері мәслелелерін қарастыратын тұрақты комиссиялар жұмыс істейді. Бірінші тоқсанда депутаттар 693 адамды қабылдап, олардың тарапынан қойылған сауалдар бойынша 391 өтініш оң шешімін тауып, қалған 302 мәселе бойынша тиісті түсініктеме беріліп, бақылауға алынған. Тұрғындарды мазалаған жағдайларға қатысты облыстық мәслихат депутаттары 44 депутаттық сауал жолдап, оларды шешуге жергілікті атқарушы органдар жұмылдырылыпты.Болат АБАҒАН, Алматы облысы