Есірткіні пайда көзіне айналдырғандар саны азаяр емес. Әсіресе, интернеттегі сауда көрігі қызып тұр. Қарағанды облысында соңғы үш айда заңсыз айналымнан 240 келіден астам әртүрлі есірткі заттары алынды. Сонымен қатар трансұлттық қылмыстық топқа тосқауыл қойылды.
Есірткі қылмысына қарсы тұру, есірткі заттарын өндірумен, тасымалдаумен, сатумен, сондай-ақ синтетикалық есірткінің жаңа түрлерін таратумен айналысатын адамдардың қылмыстық іс-әрекеттерін әшкерелеу және жолын кесу мақсатында Қарағанды облысының Полиция департаменті тұрақты негізде әртүрлі жедел-іздестіру шараларын жүзеге асырады. Нәтижесінде, 2021 жылдың 3 айында заңсыз айналымнан 240 келіден астам (синтетикалық 7 кг, марихуана 145 кг, гашиш 89 кг) есірткі заттары алынды. Есірткімен заңсыз айналым жасағаны үшін ұсталған күдіктілерге қатысты 77 қылмыстық іс қозғалды. Есірткіні медициналық емес мақсатта пайдаланғаны үшін 57 қылмыстық іс сотқа жіберілді, онда қылмыскерлерге ең қатаң жаза қолданылатын болады. – Заманауи технологиялардың дамуы, ғаламдық интернет желісінің кеңеюі кезінде денсаулық үшін өте қауіпті синтетикалық есірткіні көлеңкелі нарыққа шығаратын «жаңа» ұрпақ қылмыскерлерінің саны көбейіп жатыр. Үш айда Қарағанды облысының ПД Есірткі қылмыстарымен күрес басқармасының қызметкерлері синтетикалық есірткі өндірісі бойынша екі жасырын зертхананың қызметін тоқтатты. Мұнда қылмыскерлер синтетикалық есірткіні өнеркәсіптік ауқымда шығарған. Есірткі сатушылардан тәркіленген түрлі заттар, арнайы құрылғылар, машиналар мен жабдықтар Камаз көлігіне әрең сыйды. Аталған факті бойынша Қылмыстық кодекстің 297-бабы бойынша сотқа дейінгі тергеу басталды, – деді Қарағанды облысы ПД есірткі қылмысына қарсы іс-қимыл бөлімінің бастығы Талғат Каскин.Ұсталған ұстаз, күзетші...
2020 жылы есірткіні Telegram желісі арқылы сатқан 23 жастағы мұғалім ұсталды. Ол Қарағандыдағы мамандандырылған мектеп-интернатында дефектолог-мұғалім болып қызмет атқарыпты. Тінту жұмыстары кезінде оқытушыға тиесілі есірткінің көп мөлшері табылған. Сот үкімімен ер-азамат кінәлі деп танылып, 11 жылға бас бостандығынан айырды. Бұған қоса сот хаттамасында ұстаздың есірткіні сабақ пен жұмыс уақытынан тыс кезде таратқаны айтылды. Сонымен қатар өткен жылғы қыркүйекте Қарағанды соты «ірі көлемде психотроп затты сатып алып таратты» деп айыпталған 25 жастағы Роман Фроловты 11 жылға бас бостандығынан айырды. Сот бұған қоса оның психотропты заттарға тәуелділігін ескере отырып, есірткіден мәжбүрлі түрде емдеуді міндеттеді. Айыптау тарабының мәліметінше, тінту кезінде күдіктіден мефедрон партиясы, пирролидиновалерофенон (PVP) және экстаз таблеткалары тәркіленген. Бұрын сотталмаған ер адам процесс кезінде тағылған айыптарды мойындап, басынан кешкен жайттарды баяндап берді. Кішкентай баласы бар екенін айтып, қатаң жазаламауды өтінді. Өзінің түсіндіруінше, ақша жетпегендіктен және ақымақтықтың кесірінен есірткімен айналысқан. Айыптау тарабының мәліметінше (сотта мұны Фролов та мойындады), Фролов жасырын жұмыс істеген интернет-дүкенде есірткі тасымалдаумен айналысқан. Кейінірек өзі де сайт ашып, есірткі сатып алатын клиенттер іздеген. Жақында Қарағанды қаласының ПБ есірткі қылмысына қарсы іс-қимыл бөлімінің қызметкерлері жедел-іздестіру шараларын өткізу барысында 52 жастағы қала тұрғынын ұстады. Ол гашиш есірткі затын сатқан. Азамат әскери күзетте күзетші болып жұмыс істейді. Аталған факті бойынша, яғни Қылмыстық кодексінің 297-бабы бөлігі бойынша (есірткі заттарын заңсыз қолдану және сақтау) сотқа дейінгі тергеп-тексеру басталды.Трансұлттық қылмыстық топқа тосқауыл
Қарағанды полицейлері трансұлттық қылмыстық топтың жолын кесті. Қылмыстық топты ұстау барысында олардан 70 келі синтетикалық есірткі мен 3,5 тонна прекурсорлар табылды. Ұйымдасқан топ еліміздің 5 облысында жүйкеге әсер ететін заттарды саудалаумен айналысқан. Есірткі заттарының заңсыз айналымымен айналысатын тұлғаларды анықтау және ұстау мақсатында Қарағанды облысы Полиция департаментінің басшылығы арнайы жедел-тергеу тобын құрды. Олардың жұмысының нәтижелері бойынша ІІМ Есірткі қылмысына қарсы іс-қимыл департаментінің көмегімен Қазақстанның 5 облысының аумағында жұмыс істейтін 5 есірткі зертханасын құруға қатысы бар 10-нан астам адам ұсталды. – Қылмыстық істі тергеу барысында осы зертханаларды ұйымдастырушылар Қазақстан Республикасынан тыс жерде бола отырып, Қазақстан Республикасының, Ресей Федерациясының, ТМД елдерінің және алыс шетелдердің аумағында психотроптық заттарды дайындаумен, сақтаумен, тасымалдаумен және өткізумен айналысатын трансұлттық ұйымдасқан топ құрғаны анықталды. Сондай-ақ Telegram және «Сигнал» мессенджерлері арқылы Қазақстан аумағында жұмыс істейтін құрылымдық бөлімшесін басқарумен және үйлестірумен айналысқан, – дейді Қарағанды облыстық Полиция департаментінің басшысы Ерлан Файзуллин. Трансұлттық ұйымдасқан қылмыстық топ кураторлары психотроптық заттарды шетелден Қазақстан Республикасына жеткізу арнасын ұйымдастырған, психотроптық зат сұйық болған және автомобиль майлары мен қосалқы бөлшектер, алкогольді ішімдіктер, тұрмыстық заттардың, майлы радиаторлар мен өрт сөндіргіштердің ішіне құйылып логистикалық фирмалар арқылы тасымалданған. Трансұлттық ұйымдасқан топтың қатысушыларынан құрғақ және сұйық түрінде алынған синтетикалық есірткілердің жалпы саны 70 келіден астам дайын затты және 3,5 тоннадан астам прекурсорларды құрайды. Трансұлттық ұйымдасқан топты ұйымдастыру және басшылық ету фактісі бойынша ҚР ҚК 264-бабының 1 және 2-тармақтары негізінде сотқа дейінгі тергеу басталды. Түйін.Қазақстанда есірткіні таратушылармен күрес жүріп жатса да, ол туралы жарнамалар ғимарат, қоршау, тротуарларда ашықтан-ашық пайда болып жатыр. Сайттарда да сауда қызу. Есірткіні таратқандарға жаза күшейтілсе де әлеуметтік желі, сайт, мессенжерлерде жарнамалау тыйылмай тұр.
Әдебиет БЕЛГІБАЙҰЛЫ, Қарағанды қаласы