Өкпе қатерлі ісігі – әлемдегі ең көп таралған қатерлі ісік. Қатерлі ісік ауруын зерттеу жөніндегі халықаралық агенттіктің мәліметінше, жыл сайын 2 миллионнан астам ер мен әйел өкпе қатерлі ісігімен ауырады, олардың үштен екісі – ер адамдар (1 368 524) болса, үштен бірі – әйелдер (725 352). Жыл сайын бұл аурудан 1,8 миллионға жуық адам көз жұмады.
Өкпе қатерлі ісігінің негізгі себебі – темекі. Қазақстанда онкологиялық аурулардан болатын өлім-жітім құрылымында өкпе қатерлі ісігі де бірінші орында тұр. Мәселен, 6-7 қазақстандық күн сайын өкпе қатерлі ісігінен қайтыс болады. Өкпе қатерлі ісігімен сырқаттануға ең алдымен ер адамдар бейім болып келеді. Бұл ауруға жиі ілігетіндердің көбі Шығыс Қазақстан, Павлодар, Солтүстік Қазақстан, Ақмола және Қарағанды облыстарында екен. Қазақстанның кейбір өңірінде өкпе қатерлі ісігін ерте диагностикалау үшін пилоттық жоба – өкпені төмен мөлшерлі спиральді компьютерлік томографияның (ТМСКТ) көмегімен сканерлеу іске қосылды. Пилоттық жоба Шығыс Қазақстан, Қостанай және Павлодар облыстарында басталды. Мұндай жоба Алматы қаласында да жоспарланған. Ол осы айдан, яғни мамырдан басталады. Сондықтан егер отбасында темекі шегетін адам болса, төмен мөлшерлі спиральді КТ-да үнемі тексеріп отыру керек. Ең дұрыс шешім – темекіден бас тарту.Ж. НҰРЛАН