Алматы облысындағы «Достық» біріккен су торабында жаңа су қоймасын тұрғызу қажет. Осыған орай жобалық-сметалық құжат жасалмақ. Бұл туралы Су ресурстар комитетінің «Қазсушар» РМК бас директоры Алтай Елжасовтың осы өңірге іссапары кезінде айтылды.
Нысан ҚХР-мен шекарада, трансшекаралық Қорғас өзенінің бойында орналасқан. 2013 жылы пайдалануға берілген және екі ел біріге пайдаланатын су торабы 14,5 мың гектар аумақты алып жатыр. Құрылымның су өткізу қабілеті – 456,0 м3/с. Дегенмен соңғы 3 жылда осы су торабында судың аз келуі, климаттық жағдайдың өзгеруі салдарынан диқаншылар қиындыққа душар болыпты. Жергілікті мамандар мен шаруа қожалықтарының иелері Қорғас өзені бойына су қоймасын салу – осы мәселені шешетінін айтады. «Ауданымызда суаруға қажетті судың тапшылығы – негізгі мәселенің бірі. Бұл экологиялық ахуалға тікелей байланысты: бұған таудағы мұздықтардың азаюы, судың аз келуіне себеп. Екі ел бұл өзен суын теңдей бөліседі. Алайда бізге беріліп жатқан су өзен арнасымен Қытайға өтіп кетеді, сондықтан су қоймасын салып, мәселені түбегейлі шешуге болады», – деді «Қазсушар» РМК Алматы филиалы Панфилов өндірістік учаскесінің басшысы Тұрысбек Нұрахметов. А.Елжасов бұл ұсынысты назарға алды. «Қазсушар» мен жергілікті атқарушы орган бірлесіп, жобалық-сметалық құжаттама әзірлейтін болды. Экология, геология және табиғи ресурстар министрлігіне және Үкіметке ұсыныспен шығу жөнінде ұйғарым жасалды. Алайда шенеуніктер «Қытай не айтады?» деп қарайлап отырғанға ұқсайды. «Бұл нысан трансшекаралық аймақта орналасқан. Сол себепті бұл – Үкімет деңгейінде, екі ел арасында қарастырылатын мәселе. Дегенмен қазір жаңадан салынатын су қоймасының орнын анықтап, жергілікті билік жобалық-сметалық құжаттамасына қаражат қарастырып, Экология министрлігіне ұсынатын болады», – деді «Қазсушар» РМК бас директоры Алтай Елжасов.Елдос СЕНБАЙ