«Ер жігіт – елдің қорғаны» дейтін халықпыз. Ал Отан қорғау – әр азаматтың борышы. Спортты жанына серік етіп, әлемдік додаларда үлкен жетістіктерге жетіп, елдің туын көтеріп жүрген спортшылар арасында да Отан алдындағы азаматтық борышын өтеген азаматтар жетерлік. Біз, 7 мамыр – Отан қорғаушылар күні қарсаңында сіздердің назарларыңызға әскерге барған, есімі ел аузында жүрген бірқатар саңлақтарды ұсынбақпыз.
Сидней Олимпиадасының чемпионы Ермахан Ибраимов бір кездері әскер қатарына шақыртылып, Отан алдындағы борышын өтеген. Танымал боксшы солдат күнін былайша еске алды. – Отан алдындағы борышымды 1995-1997 жылдар аралығында өтедім. Ол кезде «Спорт шебері» деген дәрежем бар болатын. Сондықтан Орталық әскери спорттық клубтың сапына қабылдандым. Сөйтіп, ант беру рәсіміне қатыстым да, «дембель» болып үйіме қайта оралдым. Содан ішкі және сыртқы ареналарда ЦСКА-ның намысын қорғадым. 1995 жылы Қарулы Күштер арасындағы дүниежүзілік спорттық ойындар өтіп, сол жарыста чемпион атандым. 1996 жылғы Атланта Олимпиадасының ойындарына да ЦСКА-ның сарбазы ретінде қатыстым. Қазір полковник деген шенім бар, – дейді ардагер боксшы. Ал тағы бір былғары қолғап шебері Марат Мәзімбаев әскери борышын Алматыда өтеген. – Әскердің арқасында бірқатар жақсы азаматтармен танысып, достастым. Олармен әлі күнге дейін араласып тұрамын. Әрбір ер азаматтың туған елі алдында бас тартуға болмайтын абыройлы міндеті бар. Ол – Отан қорғау. Елім, жерім алдындағы парызымды 1995 жылы өтедім. Барлық сарбаздың басынан өтетін жағдай менің де басымнан өтті. Әскерде түскен суреттерді қарап отырып, сол күндерді сағынышпен еске аламын, – дейді Марат Мәзімбаев. ХVIII жазғы Азия ойындарының қола медаль иегері, таэквондошы Нұрлан Мырзабаев спортқа әскерден келген соң ден қойғанын айтады. – Таэквондомен әскерден келген соң ғана айналыстым. Жалпы, спорт атаулымен тұрақты айналысуым сол әскерге барып келген соң басталды. Әскерге 18 жасымда 2011 жылдың күзгі шақырылымымен кетіп, 2012 жылы 19 жасымда қайтып келдім. Әскери борышымды Алматы облысы Сарыөзек ауданында №12747 әскери бөлімінде өтедім, – дейді ол. «Барыс» хоккей клубының бұрынғы ойыншысы Дамир Рыспаевтың 2016 жылы әскерге барып, Отан алдындағы азаматтық борышын өтегенін бірі білсе, бірі біле бермейді. 2019 жылы желтоқсан айында бокстан әлем чемпионы, маңғыстаулық спортшы Бекзат Нұрдәулетов те Ұлттық ұлан қатарында Отан алдындағы борышын өтеді. Бірқатар жарысқа ол әскер қатарында жүріп дайындалды. – Әр азамат әскери борышын өтеуі тиіс деп санаймын. Елімізді абыроймен қорғап, үйімізге аман-сау келеміз деген ойдамын, – дейді боксшы Бекзат Нұрдәулетов. Ал Дамир Рыспаев: Әскери борышымды қай жерде өтеу керек дегенде айтарлықтай айырмашылық көріп тұрған жоқпын. Дегенмен хоккейші болғандықтан, спорттық карьерамды жалғастыра бергім келеді. Осы орайда Армияшылардың орталық спорт клубында (ЦСКА) болғанды қалар едім» дегені бар. Бұл ретте спортшыларға әскери борышын өтерде біршама жеңілдік жасалатынын, спорттық бабын жоғалтып алмас үшін оларға жаттығу жұмыстарымен айналысуға мүмкіндік берілетінін айта кетейік. Мақаламыздың соңында, отандық спортшылардың арасында кімдердің әскери атағы бар екенін де тілге тиек етуді жөн санадық. Атақты жеңіл атлет Ольга Рыпакова әр жылдардағы спорттық жетістіктері мен Олимпиада медальдары үшін майор шенін алды. Бейжіңде еркін күрестен Қазақстанның тұңғыш қола медалін жеңіп алған Елена Шалыгинаға да ұлттық армияның лейтенанты шені беріліп, «Құрмет» орденімен марапатталды. Боксшылар Данияр Елеусінов, Василий Левит және дзюдошы Елдос Сметов Қазақстан Ұлттық ұланы командасының аға спорт инспекторы болды, олар сондай-ақ лейтенант шенін де алған. 2018 жылы қаза тапқан танымал мәнерлеп сырғанаушы Денис Тен Ұлттық ұланның Алматыдағы №7552 әскери бөлімінде әскери борышын өтеп, кейін келісімшарт бойынша қызметінде қалды. Ол сол уақытта Ұлттық ұланның спорт командасында аға нұсқаушы болды. Бұдан өзге де Қазақстан әскерінің құрамында болған кәсіби спортшылар жетерлік. Олардың басым бөлігі халықаралық спорт шебері атағын алған. Олимпиада жүлдегерлері де бар. Олардың ішінде 2016 жылы Рио-де-Жанейрода топ жарған ауыр атлетиканың тарланы Нижат Рахимов пен жүзуден Лондон Олимпиадасының алтын медаль иегері Дмитрий Баландин бар. Олар әскерде жүріп, спорттан қол үзбей, әскерилер арасындағы сайыстарда да өздерінің үздік екенін көрсете білді. Жалпы, Отан алдындағы борышын өтеп, спортта да жетістіктерге жетіп, елдің атын шығарып жүрген спортшыларды ұлттың ұландары деп айтсақ артық болмас. Ендеше спортшыларымыз Отан алдындағы борышын абыроймен өтей берсін, халықаралық ареналарда жеңісті жолдарын бірінің артынан бірі жалғастырып, әрдайым көк Туымызды көкте желбіретсін деген тілек білдіреміз.Абылайхан ЖҰМАШ