Бізде, әйтеуір осылай. Бір жаңалық немесе жақсы іс жүзеге асса, оның соңынан кемшілік те қоса ілесіп жүреді. Алматы облысының Кербұлақ ауданында өңірдегі ең ірі жобалардың бірі – цемент зауыты іске қосылғанда біраз адам жұмыспен қамтылып, қазынаға түсетін қаржы молаяды деп қуанған жергілікті жұрт бүгінде кәсіпорынның арлы-берлі ағылған ауыр жүк көліктері кесірінен әп-әдемі жолдың аз ғана уақытта тас-талқан болғанынан бүгінде зардап шегіп отыр. Осыны айтып, дабыл қаққан халықтың арыз-шағымы ақыры облыс басшылығының да құлағына жетті.
Мереке алдында Алматы облысының әкімі республикалық маңыздағы Сарыөзек – Көктал жолының жайы туралы шұғыл жиын өткізіп, жауапты тұлғаларға жағдайды түзеу үшін бір апта уақыт берді. Сарыөзек кентіне жақын жерден цемент зауыты ашылғаннан кейін кәсіпорын мен кеніш арасына қатынайтын салмағы ауыр көліктер күн сайын Сарыөзек –Көктал жолының 68 шақырымын жүріп өтеді. Бұл тек бір бағыты ғана екенін ескерсек, күнделікті шамамен 10-нан астам ауыр көлік бір қатынағанда 136 шақырым жүреді. Карьер қызметкерлерінің айтуынша, жүк тасымалдаушылар күніне үш рет қатынайды. Қалғанын өзіңіз есептей беріңіз. Жергілікті тұрғындар да, Кербұлақ ауданының басшылығы да жолдың бұзылуына жүк көліктері себепші болғанын айтады. «Мен Қоғалы ауылында тұрамын. Осы жолмен жиі жүремін. Ары-бері өткен сайын шаршаймын. Көлігімнің жүріс бөлігін 2-3 ай сайын ауыстырып тұруға тура келеді. Асфальттың осындай күйге түсуіне цемент зауытының жүк көліктері кінәлі. Олар материалды басып тиеп алып, осы жерлерден күнде жүреді. Асфальтты әбден отырғызып тастады», – дейді жергілікті автокөлік иелерінің бірі. Мамандардың да пікірі осындай. Олар жоба бойынша жолдың бұл бөлігі шамамен 8 тоннадан аспайтын жүктемесі бар көліктерге есептелген дейді. Алайда зауыт жұмысқа кіріскелі бұл жерлермен күнделікті салмағы 50 тонналық көліктер арлы-берлі қатынайды. Жолдың тез бұзылуының басты себебі де осы жағдай екені айдан анық. Жұртты алаңдатқан жағдайға байланысты облыс әкімі де жауапты тұлғаларға өзінің наразылығын білдірді. Өңір басшысы жедел жиын кезінде зауыт басшылығынан нақты жауап талап етті. Тұрғындардың қауіпсіздігіне немқұрайды қарауға жол бермейтінін, сондықтан жағдайды жылдам түзету қажетін айта келе, барлық уәкілетті тұлғаларға қатаң ескерту жасады. Жергілікті жердегі жауаптыларға жағдайды тұрақты бақылауда ұстауды, бір аптадан соң қабылданған шаралар туралы есеп беруді тапсырды. «Жолдың зақымданған бөліктерінің бәрін жедел қалпына келтіріңдер, адамдардың өміріне қауіп төндіретін жағдай болмауы керек. Халыққа қызмет етіп тұрған нәрсені бұзуға ешкімнің де құқығы жоқ, талап сондай! Жап-жақсы жолды аз ғана уақытта қалай сондай жағдайға жеткізуге болады? Бүлінген жол бөлігінде қазір мүлдем асфальт жоқ. Әсіресе, аса қауіпті болып саналатын Алтынемел асуындағы бөлік мүлде бұзылған. Бір апта уақыт беремін! Осы уақыт аралығында бәрін қалпына келтіріңдер», – деді облыс басшысы. «ҚазАвтоЖол» АҚ облыстық филиалы директорының міндетін атқарушы Мерей Шахарбаевтың айтуынша, орын алған мәселені шешу үшін «ҚазАвтоЖол» АҚ облыстық филиалы, «КазАвтоЖол» ЖШС және «Алацем» цемент зауытының арасында үшжақты келісім жасалыпты. Енді соның аясында бірлесіп қысқа мерзім ішінде жолдың зақымданған 0-68 шақырым аумағына жөндеу жүргізіледі.Болат АБАҒАН, Алматы облысы