Футболдан Еуропа Чемпионатының ресми плей-листінен бірден бірнеше трек алып тасталды. Мұның себебі, мәтіндерде боқауыз сөздердің кездесуі, - деп хабарлайды Prosports.kz.
Олардың ішінде қазақстандық Иманбек, ресейлік Моргенштерн және америкалық Fatty Wap бірлесіп шығарған туынды Leck әні де бар.
РИА Новостидің хабарлауынша, УЕФА-ның баспасөз қызметі плейлист әзірлеушілерімен байланысқа шығып, мәтіндегі ұятсыз сөздерге байланысты бұл әндерді алып тастауды бұйырған.
Әндер плейлист ресми жарияланғаннан кейін жойылды. Трек тізімін футболшылар таңдаған.
Еуро-2020 коронавирус кесірінен 2021 жылға ауыстырылды. Чемпионат 11 маусымнан 11 шілдеге дейін Еуропаның 11 қаласында өтеді: Санкт-Петербург, Баку, Амстердам, Будапешт, Бухарест, Глазго, Копенгаген, Лондон, Рим, Мюнхен және Севилья.
