Сенат Төрағасы Мәулен Әшімбаев Еуропадағы қауіпсіздік және ынтымақтастық ұйымының Нұр-Сұлтан қаласындағы Бағдарламалар кеңсесінің басшысы Фолькер Фробартпен кездесті. Жүздесу барысында Қазақстан мен ЕҚЫҰ арасындағы ынтымақтастықты дамыту мәселелерін талқылады.
Сенат Төрағасы елімізде Мемлекет басшысының бастамасымен іске асырылып жатқан маңызды саяси реформалар жөнінде айтып өтті. Соның ішінде сайлау туралы заңнамаларға енгізілетін өзгерістерге кеңінен тоқталды. «Биыл 15 қаңтарда Парламенттің жаңа шақырылымының сессиясы ашылды. Сол жиында Президентіміз Қасым-Жомарт Тоқаев бірқатар саяси бастамаларды ұсынды. Нақты айтқанда, саяси партиялардың Парламент Мәжілісіне және мәслихаттарға өту шегін 7-ден 5 пайызға дейін төмендету ұсынылды. Сондай-ақ сайлау бюллетеньдеріне «Бәріне қарсымын» деген жазуды қосу мәселесі көтерілді. Қазір тиісті заң жобасын Сенат қарап жатыр», – деді М.Әшімбаев. Сонымен қатар сұхбаттасушылар халықаралық мәселелерге де назар аударды. Оған сәйкес кездесу кезінде Орталық Азия елдерінің өзара қарым-қатынасын дамыту және Ауғанстанды қалпына келтіру мәселелері талқыланды. Бұдан бөлек, әңгіме барысында екі жақ өңірде су ресурстарын пайдалану, оның ішінде Арал теңізінің экологиялық ахуалы жайында сөз қозғады. «Арал теңізінің қазіргі ахуалы Орталық Азия елдеріндегі миллиондаған тұрғындардың өмір сүру сапасына кері әсерін тигізіп отыр. Біздің елдеріміз халықаралық ұйымдармен бірлесіп, Арал теңізі бассейніндегі экологиялық және әлеуметтік-экономикалық дағдарысты еңсеру үшін жұмыс істеуде. Өңір елдерінің бастамасымен құрылған Халықаралық Аралды құтқару қоры жұмыс істеп тұр. Қазақстан Арал теңізін қалпына келтіру бағдарламасын іске асыру аясында су көлемін ұлғайтты»,– деді Мәулен Әшімбаев. Кездесу соңында екі тарап Қазақстан мен ЕҚЫҰ арасындағы ынтымақтастықты арттыруға мүдделі екенін білдірді.Елдос СЕНБАЙ