«Nur Otan» партиясы Шымкент қалалық филиалы жанындағы Білім және ғылымды дамыту жөніндегі қоғамдық кеңесінің отырысы өтті.
Отырысты кіріспе сөзімен ашқан Білім басқармасының басшысы Жанат Тәжиева білім саласы жылдан-жылға жақсы жолға қойылып келе жатқанын айтып, осы мақсатта атқарылған бірқатар іс-шараға тоқталды. Жиында қоғамдық кеңес мүшелері сайлауалды бағдарламаны жүзеге асыру мақсатында дайындалған Жол картасындағы негізгі көрсеткіштердің орындалуына бақылау жасап, құрылысы жүріп жатқан және алдағы уақытта салынатын білім мен ғылым мекемелерінің дер кезінде пайдалануға берілуін қадағалайтынын тілге тиек етті. Сондай-ақ кеңес мүшелері материалдық-техникалық базаның жаңартылуын, білім сапасының артуын, кәсіби мамандардың білімін жетілдіруді жіті назарда ұстайды. Кеңес мүшелері отырыс барысында білім сапасын бақылау, бағалау жүйесін жетілдіре түсудің маңыздылығы туралы айтып, адымдап болса да алға жылжып отыруды, талаптарды күшейте отырып, төмен көрсеткіштерді көтеру бойынша жоспарлы шаралар барысын қалыптастыру қажет екенін де ерекше атап өтті. Айта кетейік, қоғамдық кеңеске партияның қоғамдық-саяси іс-шараларына қатысып, праймеризде белсенділік танытқан тарих ғылымдарының кандидаты, доцент, ОҚМПУ проректоры Баршагүл Исабек жетекшілік етеді.А.ЖҰМАШ