Талдықорған қаласында тұңғыш рет инклюзивті сұлулық салоны ашылды. Салонда ерекше қажеттіліктері бар адамдарға қызмет көрсетіледі.
Жоба жас кәсіпкер, «Бастау Бизнес» жобасының түлегі Кама Далдабаева мен «Мейірім» мүгедектер қоғамдық бірлестігінің төрайымы Гүлвира Таубалдинованың бастамасымен жүзеге асырылды. Олардың айтуынша, идея бірнеше жыл бұрын пайда болып, бүгінде мемлекеттік қолдау мен қоғам өкілдерінің жәрдемі арқасында орындалыпты. Кама Далдабаева осыдан екі жыл бұрын «Еңбек» мемлекеттік бағдарламасы бойынша «Бастау Бизнес» оқыту жобасынан өтіп, кәсіпкерлік дағдыларын меңгерді. Өткен жылы оның «Мүмкіндігі шектеулі жандарға арналған білім беру орталығы бар сұлулық салоны» жобасы «Бизнестің Жол картасы – 2025» мемлекеттік бағдарламасы аясында 2 миллион теңге көлемінде грантқа ие болды. Кәсіпкер ең қажетті жабдықтарды сатып алды. Салонға кіреберісте пандус орнатылған және мүгедек адамдарға қызмет көрсету үшін барлық жағдай жасалған. Кәсіпкердің айтуынша, салонда 14 жұмыс орны ашылады, оның жартысына мүгедектігі бар азамат қамтылады. «Бала кезімнен маған шаш қию және түрлі шаш үлгілерін жасау ұнайды. Ұзақ уақыт бойы салонда шаштараз маманы болып жұмыс істедім, сонымен бірге оқу курстарын жүргіздім. Екі жыл бұрын жеке кәсібімді ашып, мүгедектігі бар адамдарға қызмет көрсететін сұлулық салонын ашуды ұйғардым. Кеңес алу үшін «Атамекен» кәсіпкерлер палатасына жүгініп, «Бастау Бизнес» жобасына жазылдым. Оқу барысында жобамды әзірлеп, грант бұйырды», – дейді кәсіпкер. Сұлулық салонына келуге мүмкіндігі жоқ азаматтарға көшпелі қызмет көрсету де ұйымдастырылады. Сонымен қатар жақын арада мұнда сұлулық индустриясы мамандықтарына оқыту жоспарланып отыр. «Біздің ұйым бес жылдан астам уақыт бойы мүгедектігі бар адамдармен жұмыс істеп келеді. Бұл біздің алғашқы жобамыз емес. Бұған дейін «Қадам» ЖК-мен бірге инклюзивті салон аштық, мұнда дені сау адамдар да, мүгедектер де қызмет көрсете алады. Қазақстанда ашылған алғашқы инклюзивті салон десек те артық айтқандық бола қоймас. Болашақта нысанның қарқынды дамуына сенімдімін. Алдағы уақытта тәжірибе мен дағдыларға ие болған ерекше қажеттілігі бар жас балалар келешекте өз бизнестерін ашуы да мүмкін. Біз оларға осы бағытта барынша қолдау көрсететін боламыз» деген «Мейірім» мүгедектер қоғамдық бірлестігінің төрайымы Гүлвира Таубалдинованың айтуынша, мүгедектігі бар адамдар арасында жаңа кәсіпті меңгеріп, еңбек етуге дайын дарынды жастар көп. Нысанның ашылған алғашқы күнінде салонға 15-тен астам адам жазылды. Олар қаламызда инклюзивті салонның ашылғанына қуанышты. Өздеріне қажетті қызметтерді еркін түрде пайдалана алады. Бастысы – қолжетімді. Жобаға Алматы облысының Іскер әйелдер кеңесі мен «Nur Otan» партиясының – «Кедергісіз келешек» партиялық жобасы қолдау көрсеткен.Болат АБАҒАН, Алматы облысы