Биыл жиырма бес жылдық меретойын тойлағалы отырған Лев Гумилев атындағы Еуразия ұлттық университетіне 2000 жылы қазан айында сол кездегі ректор Мырзатай Жолдасбековтің шақыруымен келіп, «Алгебра және геометрия» кафедрасына меңгеруші болып жұмысқа орналастым. 2001 жылы ғылыми бағытыма сәйкес, «Қолданбалы және есептеу математикасы» кафедрасын ашып, сонда 2009 жылдың көктеміне дейін кафедра меңгерушісі, 2009-2018 жылдары «Іргелі математика» кафедрасының профессоры болып қызмет еттім.
2018 жылдың күзінен бастап Еуразия математикалық институтының директоры қызметін атқарып келемін. Елорданың алғашқы қабырғасы осы университеттің ғимаратынан басталады деген сөз тегін емес. Біз келген жылдары жаңа үлгідегі бас ғимараттың сән-салтанаты көздің жауын алатын. Сол ғимаратқа бүкіл түркі жұртының көне тарихы «Күлтегін» ескерткішінің көшірмесін әкеліп орнатты. Оған Президенттен бастап елдің жақсы-жайсаңы түгел қатысты. Ол кездің қиындығы да, қызығы да болды. Астана көшелеріне асфальт салынбаған, жаңбыр жауса, жер балшық, әсіресе көктем кезінде университет ғимараттарының алдында аяқкиім жуатын суға толы астау тұратын. Бір кездері ғимараттың ішіне киетін қосымша аяқкиім міндеттеліп, анда-санда ұмытшақтығымнан ішке киетін аяқкиіміммен балшыққа батып, үйге жеткен кездерім де болды. Қазір ол қиыншылықтан да өттік. Ол күндер бір ертегі сияқты. Университеттің ғимараты жаңа заманның технологиясымен жасақталды. Алғашқы жылдары математика саласынан мамандар өте тапшы болып, 2001 жылы ашылған кафедраның жұмысын бар болғаны бес оқытушымен атқарып жүрдік. Мен университетке Ғылым академиясы жүйесінен келген едім. Ол жақта ғылыми-зерттеумен айналысасың. Университет көп бағытты болғандықтан, маған алғашында психологиялық тұрғыдан қиындау болды. Сөйтіп жүргенде, 2005 жылы эксперименттік түрде шетелдік профессорлармен бірігіп PhD докторанттар дайындау бағдарламасы бойынша университетке қаржы бөлінді. Бұл мәселе бойынша 2004 жылы Швецияның профессоры Ларс-Ерик Перссонмен (Lars-Erik Persson) Чехияның астанасы Прагада кездесіп, 2002 жылы кандидаттық қорғаған шәкіртім Айгерім Қалыбайға Швецияда PhD диссертациясын қорғау үшін орындайтын тапсырмалар берген екен. Соның нәтижесінде 2006 жылы Швецияның Лулео технологиялық университетімен Еуразия ұлттық университетінің арасында PhD докторанттар дайындау жөнінде келісімшарт жасалды. Бұл келісімшарт бойынша ЕҰУ-дің PhD докторанттары Швецияның Лулео технологиялық университетінде өздерінің PhD диссертациясын қорғай алады. Мұнай келісімшарт математика саласы бойынша бүкіл Қазақстанда тек Еуразия университетінде жасалды. Осы келісімшарттың негізінде 2006 жылы А. Қалыбай PhD диссертациясын Швецияның Лулео технологиялық университетінде қорғап, Швецияның PhD докторы деген ғылыми дәрежесін алды. Ол бұл бағдарламаның бірінші түлегі еді. Ары қарай 2007 жылы Италияның Падова университетімен бірігіп, PhD докторанттар дайындау бойынша қос дипломдық келісімшартқа қол жеткіздім. Бұл келісім бойынша Еуразия ұлттық университетінің PhD докторанттары Падова университетінде алты ай тағылымдамадан өтуі керек. Осы келісімшарттардың арқасында ЕҰУ-дің тоғыз PhD докторанты Швецияның Лулео технологиялық университетінде, бес докторанты Италияның Падова университетінде диссертацияларын қорғап шықты. 2000-жылдан бері қарай ЕҰУ-дің қабырғасында сегіз ғылыми жобаға ғылыми жетекші болдым. 2009 жылы университет ректоры Бақытжан Әбдірайым халықаралық жоғары рейтингі бар журналда мақаласын жариялаған оқытушыларға ақшалай сыйлық беремін деп ұсыныс жасады. Бұл ұсыныс Қазақстанның барлық университетіне тарап, ЕҰУ-мен қатар Қазақстан ғылымының дамуына үлкен серпіліс болды. Жалпы, Еуразия ұлттық университетінің қабырғасында 80-нен астам ғылыми мақала жариялаппын. Профессор Виктор Инванович Буренковпен бірігіп 2003 жылдан бастап университетте ағылшын тілінде халықаралық стандартпен математикалық журнал шығару мәселесін көтердім. Бұл мәселені 2008 жылы университет ректоры Бақытжан Әбдірайым қолдап, 2010 жылдан бастап ЕҰУ-де Eurasian mathematical journal шыға бастады. Биыл 2021 жылы ол журналдың 12 томы жарық көріп отыр.Рысқұл ОЙНАРОВ, ҚР ҰҒА академигі, физика-математика ғылымдарының докторы, профессор