Сауда және интеграция вице-министрі Қайрат Төребаев 21 мамырда "Nur Otan" партиясының республикалық қоғамдық қабылдауында азаматтарды онлайн қабылдады.
Вице-министрмен кездесуге 3 адам келді, олар бірқатар мәселені көтерді.
Осылайша, өтініш беруші Ержан Батешов қазақстандық көмірді Қытайдың энергия тұтыну нарығына сатуды ұлғайту мүмкіндігін зерделеу бойынша өзекті мәселемен жүгінді.
Оның айтуынша, Қытай Аустралиядан көмір сатып алуды қатты шектеді. Осылайша, Ресей көміршілері біртіндеп Қытайға көмір жеткізу жұмыстарын күшейтті. Соның ішінде Ресей Федерациясы көмір тасымалының өткізу қабілетін арттыру үшін өз елінің шығысында теміржол құрылысын жандандырды.
Сұраққа жауап бере отырып, Қайрат Төребаев қазіргі уақытта ҚР ИИДМ шекара станцияларының тасымалдау қабілетін арттыру және ҚР мен ҚХР станцияларын ауыстырып тиеу және ауыстырып тиеу қуаттарын дамыту бойынша жұмыстардың жүргізіліп жатқанын хабарлады.
Сондай-ақ, вице-министр шекара өткелінің шектеулі өткізу қабілеті, Қытай тарапынан 1520 мм жолтабан вагонынан 1435 мм жолтабан вагонына жаппай жүктерді қайта тиеуге шектеулер, Қазақстаннан таскөмірді Қытай темір жолдары бойынша тасымалдауға "Қытай темір жолдарының" жоғары тарифтері сияқты белгілі бір кедергілер бар екенін атап өтті. Пандемияға байланысты Қазақстанның темір жолдарына экспорт пен импортты, сондай-ақ транзиттік тасымалдарды ескере отырып, толық көлемде қызмет көрсету мүмкін емес, бұл артық жүк тиеуді туындатады.
Қайрат Төребаевтың пікірінше, мәселені басқа жағынан қарастырған жөн.
"Мысалы, көмірді сыртқа шығармай, одан қосымша тауар жасау керек, яғни көмірді газдандыру мәселесін қарастырып, оны басқа түрде экспорттау керек, ол уыттылығы аз және қосылған құны жоғары. Бұл ретте көмірді газдандыру экологиялық зиян келтірмейді", - деді вице-министр.
Өз құзыреті шеңберінде Қайрат Төребаев бұл мәселе жақын арада ҚХР-мен сауда-экономикалық ынтымақтастық жөніндегі жұмыс тобы отырысының күн тәртібінде талқыланатынын айтты.
"12 ай" дүкенінің директоры Марат Черебедов карантин және санитарлық нормаларды сақтау режиміндегі құрылыс дүкенінің жұмыс мәселесі бойынша өтініш жасады.
"Әлемдік пандемияға байланысты жағдайдың дамуы аясында Қазақстандағы бизнес субъектілері өз қызметін бас мемлекеттік санитарлық дәрігердің қаулысына сәйкес жүзеге асыруда. 4.38-тармаққа сәйкес жұмыс күндері сағат 09:00-ден 22:00-ге дейін сауда алаңы 2000 м2-ден асатын объектілер және сауда алаңына қарамастан сауда желілері үшін азық-түлік емес тауарларды өткізу жөніндегі объектілердің жұмысын ұйымдастыруды қамтамасыз ету қажет. Бұл ретте Нұр-Сұлтан қаласы «қызыл аймақта» болған жағдайда, сенбі және жексенбі күндері жұмыс істеуге құқығы жоқ. COVID-19-ға қарсы күресте қосымша сақтық шаралары аясында кәсіпкерлік объектілеріне кіру үшін "Ashyq" мобильді қосымшасын пайдалану қажет", - деді Қайрат Төребаев.
"Тігін әлемі" жобасының авторы Қарлығаш Балғымбекова вице-министрге жеңіл өнеркәсіп саласындағы сауданы интеграциялау және жақсарту мақсатында жобасын қолдау туралы өтінішпен жүгінді.
Қайрат Төребаев бүгінгі таңда мемлекет отандық кәсіпкерлерді қолдау бойынша бірқатар бағдарламаларды жүзеге асырып жатқанын хабарлады.
Осындай бағдарламалардың бірі мақсаты жаппай кәсіпкерлікті дамыту болып табылатын "Бастау" жобасы. Жобаны "Атамекен" ҰКП Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған "Еңбек" бағдарламасы аясында 2017 жылдан бастап жүзеге асырып келеді және қазірдің өзінде 30 мыңға жуық кәсіпкерге қолдау көрсетілді.
Бұдан басқа, тауарларды экспорттау мақсатында вице-министр жақын арада «QazTrade» сауда саясатын дамыту орталығы» АҚ шикізат пен жабдық, сондай-ақ жоспарланған өткізу нарықтары импортталатын тауарлардың түрлерін нақтылау үшін материалдардың толық топтамасымен жүгінуді ұсынды.