Көкшетауда асық атудан Ұлттық мектеп лигасы өтті. Қарағанды облысының 8-сынып оқушысы жеңімпаз атанды.
Сайысқа 7-8-сыныптар арасында барлығы 50 оқушы, оның ішінде Қарағанды облысынан 6 адам қатысты. Турнирде үздік ойынымен көзге түскен Абай ауданының 8-сынып оқушысы Нұрдәулет Есімов «Алтын сақа» сыйлығының иегері атанды. Бұл жүлде ең жақсы ойыншыға беріледі. Өз кезегінде жарыс жеңімпазын Асық ату республикалық федерациясының вице-президенті Жомарт Сабыржанов марапаттап, жеңімпазды жүлдесімен құттықтады. 14 жастағы Нұрдәулет Абай ауданы Құлайғыр ауылының «Топар» жалпы білім беретін мектебінде оқиды. Асық ойнаумен 8 жасынан бастап айналысатын оқушыны денешынықтыру пәнінің мұғалімі Нұрлан Рахметов жаттықтырады. Айта кетейік, Нұрдәулет асық атудан аудандық және облыстық жарыстардың жеңімпазы.А.ЖАСАН