«Nur Otan» партиясының Ақмола облыстық мәслихатындағы депутаттық фракциясының кезекті отырысында облыс бойынша сайлауалды бағдарламаны іске асырудың жай-жапсары талқыланды.
Жол картасының «Өмір сүру ұзақтығын ұзарту», «Тұрмыстық жағдайды жақсарту» және «Кәсіпкерлерді қолдау» бағыты бойынша жауапты депутаттар есептік кезеңдегі жұмыстарын баяндады. Мәселен, облыстық партия филиалы жанындағы денсаулық сақтау саласын дамыту бағыты бойынша қоғамдық кеңестің төрағасы, облыстық мәслихат депутаты Ерлан Аяғанов денсаулық саласындағы жетістіктер мен бірқатар проблемаға тоқталды. Бүгінде облыс көлемінде медициналық ұйымдардың жабдықталуы 75,97% құрайды. 2021 жылы денсаулық сақтау мекемелерінің материалдық-техникалық базасын денсаулық сақтау саласына арналған республикалық бюджеттен бөлінетін субвенциялар есебінен нығайту мақсатында 924,3 млн теңге сомасына 77 бірлік медициналық жабдық сатып алу жоспарланған. Медициналық жабдықталу ойдағыдай жүріп жатқанымен, облыста 290 дәрігер маман тапшы. Маман тапшылығы мәселесін шешу үшін облыстық бюджет есебінен 35 студент республиканың жоғары оқу орындарында резидентураға оқуға жіберілді, сонымен қатар Көкшетау мемлекеттік университетіне «Жалпы медицина» мамандығы бойынша 50 грант бөлінген. Өңірде медицина ұйымдарының құрылысы жүріп жатыр. Бүгінде Құрылыс басқармасы мердігерлермен Қараөткел ауылында дәрігерлік амбулатория мен Целиноград ауданы Қоянды ауылында алғашқы медициналық-санитарлық көмек пунктінің құрылысын бастау үшін келісімшарттар жасасты. Сонымен бірге Денсаулық сақтау басқармасы 2023 жылға дейін Көкшетауда 630 төсектік көпсалалы облыстық аурухана мен жедел жәрдем стансасының құрылысын жүргізіп жатыр. «Сарыарқа» шағынауданынан құрылыс үшін 17 гектар жер бөлінген. Құрылыс мемлекеттік-жекеменшік серіктестік аясында жүргізілмек. Жедел жәрдем стансасының құрылысы үшін «Сарыарқа» шағынауданынан 1,5 гектар жер учаскесін бөлу жұмыстары жүзеге асырылып жатыр. Ал «Тұрмыстық жағдайды жақсарту» индикаторы бойынша есеп берген облыстық мәслихат депутаты Абай Жорабек 4 айдың қорытындысы бойынша Ақмола облысында 198 мың шаршы метр пайдалануға берілгенін мәлімдеді. Сондай-ақ биыл көпбалалы отбасыларға арналған тұрғын үй құрылысына республикалық бюджеттен 1,0 миллиард теңге бөлініп, жұмсалды. Жыл соңына дейін 179 көпбалалы отбасын баспанамен қамтамасыз ету жоспарланып отыр. Биыл 4 айдың қорытындысы бойынша 197,9 мың шаршы метр пайдалануға берілді, бұл өткен жылдың сәйкес кезеңімен салыстырғанда 104,8% құрайды. Облыстың Ақкөл, Егіндікөл, Жақсы, Зеренді, Сандықтау, Шортанды аудандары мен Көкшетау қаласында тұрғын үйді пайдалануға беру жоспары орындалмаған. Бұл депутаттардың тікелей бақылауында деп сендірді А.Жорабек. «Шағын және орта кәсіпкерлердің өсімі үш аумақта байқалып отыр», – деді өз баяндамасында облыстық мәслихат депутаты Әділ Жұмабаев. Бұл Целиноград, Аршалы және Көкшетау. Оған қоса, «Бизнестің Жол картасы – 2025» бойынша ең көп қабылданған жобалар Целиноград, Көкшетау және Бурабай аудандарында екен. Жауапты депутаттардың есебін тыңдаған фракция мүшелері күн тәртібіндегі барлық мәселені бақылауына алды.Әбілмансұр ЖАСАН