Ел Парламенті ұлттық компаниялар мен мемхолдингтердің сатып алуын реттейтін заңдарды қабылдады. Бұрын ондай ережелер де, тиісінше бірыңғай реттеу қағидаты да болмаған еді. Сенат Спикері Мәулен Әшімбаевтың төрағалығымен өткен палата отырысында сенаторлар тиісті заң жобасын құптады.
Жаңа заңдар бір жағынан сатып алу рәсімдерін жеңілдетеді және екінші жағынан шарттар бойынша міндеттемелердің орындалуына бақылауды күшейтеді. Яғни, заң кәсіпкерлер үшін квазимемлекеттік сектордың сатып алуларында ашық және әділ бәсекелестікке жағдай жасайды. – Мемлекеттік қаржыны тиімді жұмсау – аса маңызды мәселе. Мемлекеттік сатып алуды, оның ішінде квазимемлекеттік сектордың сатып алуын тиімді пайдалануды пандемиядан кейінгі кезеңде экономикалық бәсекелестікті қалпына келтірудің тетігі ретінде қарастырған жөн. Алайда осыған дейін ұлттық компаниялар мен мемлекеттік холдингтердің сатып алулары жалпы тәртіптен шығарылып, өз ережелері бойынша жүргізіліп келді. Мемлекет басшысының тапсырмасы бойынша осы мәселелерді шешу үшін тиісті заң қабылданып отыр, – деді Мәулен Әшімбаев. Атап айтқанда, сенаторлар алдымен «Квазимемлекеттік сектордың жекелеген субъектілерінің сатып алуы туралы» заңы жобасын қарады. Бұл құжат «Самұрық-Қазына» ұлттық әл-ауқат қорының және басқа да ұлттық холдингтер мен компаниялардың сатып алуларын реттейді. Онда сондай-ақ сатып алуға қатысуға байланысты шектеулер, бақылау мәселелері, сондай-ақ рәсімдердің өтуіне шағымдану тәртібі жазылған. Енді сатып алуға қатысуға байланысты шектеулер тізбесі, оларды жоспарлау қағидалары және әлеуетті жеткізушіге қойылатын біліктілік талаптары белгіленгені де маңызды. Бұдан бөлек, құжатта сатып алуға жосықсыз қатысушылардың тізілімі енгізіледі. Сонымен бірге оны қалыптастыру, жүргізу тәртібі және оған енгізу және шығару үшін негіздер айқындалған. Тапсырыс берушінің және сатып алуды ұйымдастырушының әрекеттері мен шешімдеріне шағым жасау жөніндегі нормалар енгізілді. Сондай-ақ сенаторлар «Кейбір заңнамалық актілерге квазимемлекеттік сектордың жекелеген субъектілерінің сатып алуы мәселелері бойынша өзгерістер мен толықтырулар енгізу туралы» заңды құптады. Құжат кейбір заңнамалық актілерді қабылданған «Квазимемлекеттік сектордың жекелеген субъектілерінің сатып алуы туралы» заңға сәйкестендіруді көздейді. Мұның сыртында Парламент «2014 жылғы 29 мамырдағы Еуразиялық экономикалық одақ туралы шартқа өзгерістер енгізу туралы хаттаманы» ратификациялады. Бұл құжат Президенттің қол қоюына жолданады. Отырыста Сенат депутаттары Президенттің Жоғарғы Соттың судьясын қызметтен босату туралы ұсынуын қарады. Судья Лариса Шепелева отставкаға кетуіне байланысты қызметінен босады.Елдос СЕНБАЙ