Мүгедек балалар жаппай қайта куәландырылады
Мүгедек балалар жаппай қайта куәландырылады

Мемлекеттік қызметтердің бәрі проактивті форматта көрсетілуі, яғни жүгіндірмей, жүгіртпей-ақ тағайындалуы тиіс. Бұл туралы Мәжіліс Спикері Нұрлан Нығматулиннің тө­рағалығымен өткен палатаның жалпы отырысында айтылды. Жиында азаматтардың жекелеген санатын әлеуметтік қор­ғайтын заң жобасы құпталды.

Депутаттар «Кейбір заңнамалық актілерге азаматтардың жекелеген санат­тарын әлеуметтік қорғау мә­селелері бойынша өзгерістер мен толықтырулар енгізу туралы» заң жобасын I оқылымда мақұлдады. Құжат 7-16 жас арасындағы мүгедек балаларды қайта куәландыруды қарастырады. Заң жобасында қарас­тырылғандай, мүгедектік тобы енді 7 жастан бастап белгіленбек. Бұған дейін дертінің және кемістігінің дәрежесіне, ауырлығына қара­мастан, мүмкіндігі шектеулі бала­лардың бәрі «16 жасқа дейінгі мүге­дек бала» деген жалғыз санатқа жат­қызылатын. Енді әр топқа ажы­ратылады. Яғни, алда бүкіл Қа­зақстан бойынша 16 жасқа дейінгі мүгедек балаларға мүгедектік тобы анықталуы үшін қайта куәлан­ды­рылудан өтуге тура келмек. Осыған байланысты Н.Нығматулин ата-аналар балаларының мүгедектігін дәлелдеу үшін кабинет жағалап, құжат жинамауы үшін аталған рәсімді жеңілдету және оны про­активті форматта енгізу қажет еке­ніне назар аудартты. – Еңбек және халықты әлеу­меттік қорғау министрлігінің Ден­саулық сақтау министрлігімен бірге, қазірден бастап бірлескен іс-қи­мылдарының алгоритмін түзгені маңызды. Ата-аналар дүр­белеңге түспеуі үшін ақпараттық жүйелердің барлығын интег­­рациялау процесі жедел аяқталуы керек, – деді Мәжіліс Төрағасы. Ол жаңашылдықтарды халыққа дұрыс түсіндіру қажетін қаперге салды. Заң жобасы І топтағы мүге­дек­терге күтім жасайтын адамдар үшін ең төмен күнкөріс деңгейінің 1,4 мөл­­шерінде жәрдемақы енгізеді. Мүгедек балаларға мүгедектігі бойын­ша және асыраушысынан айырылу жағдайы бойынша 2 жәр­демақыны да қатар алу құқығын береді. Бұл норма 2 мыңнан астам адамды қамтиды. Мүгедек бала тәрбиелеп отырған отбасыларға мемлекеттік тұрғын үй қорынан бас­п­ана алу кезектілігін бала 18 жас­қа толған жағдайда да сақтау көзделеді. Жалпы отырыста депутаттар «Кейбір заңнамалық актілерге рейдерлікке қарсы күресті күшейту, кәсіпкерлік қызметті мемлекеттік органдар мен лауазымды адам­дар­дың заңсыз араласуынан қорғау және бағалы металдардың заңсыз айналымына кедергі келтіретін ша­раларды күшейту мәселелері бойын­ша өзгерістер мен толық­тырулар енгізу туралы» заң жобасын I оқы­лымда мақұлдады. Құжатты тал­қылау барысында Нұрлан Нығ­ма­тулин Ресей мен Беларусьтен айыр­машылығы сол, Қазақстанда бағалы металдардың заңсыз айна­лымы саласында жасалған қыл­мыстар үшін қылмыстық жауап­кершілік қарастырылмағанын еске салды. Бізде тек айыппұл ғана салынады. «Бұл қылмыстық белсенділіктің кең таралып, өсуіне әкелгені анық. Мәселен, тек Степногор өңірінде 2015-2020 жылдар аралығында құрамында алтыны бар, заңсыз өн­дірілген 6 357 тонна шикізат тәр­кіленді», – деді палата Спикері. Нә­тижесінде, ел экономикасына елеулі залал келтірілді, салықтар, бюджетке төленетін басқа да мін­детті төлемдер түспеді.

Айхан ШӘРІП