Балалар үшін ең қызықты маусым басталды. Оқудан қолы босап, ең ұзақ каникулға шыққан өскелең ұрпақ парктерге, өзен-көл жаққа лап қойды. Бұл кезең мемлекеттен де, ата-аналардан да жоғары жауапкершілікті талап етеді. Өйткені пандемия жалғасып жатыр. Денсаулық сақтау министрлігі биыл балалар лагерьлері қайта ашылып жатқанын да жария етті.
Былтыр пандемияға бола олар жұмыс істей алмаған. Бірақ биыл да шектеу бар: «жасыл» аймақтағы жазғы лагерьлер – шектеусіз, «сары» аймақтағы лагерьлерде – 50%-ға, ал «қызыл» аймақтағы лагерьлер 30% ғана толық жұмыс істей алады. Барцлық персонал 72 сағат бұрын ПТР-тест тапсыруы не COVID-19-ға қарсы вакциналаудың толық курсын алғаны туралы құжатын көрсетуі шарт. ДСМ Санитарлық-эпидемиологиялық бақылау комитеті басқармасының бас сарапшысы Индира Басманованың айтуынша, лагерьде демалғысы келетін балада денсаулық жағдайы туралы құжаттары – 079/у нысанындағы медициналық анықтамасы, инфекциялық аурулары, COVID-19 вирусы жоқтығын айғақтайтын анықтамалар, келуден 72 сағат бұрын жүргізілген COVID-19 тестінің теріс нәтижесі бар құжат болуы тиіс. Ол комитет сайтында талаптарға сәйкес келетін Қазақстанның балаларды сауықтыру ұйымдарының тізімі тұрғанын еске салды. Комитет дерегінше, 2021 жылғы 27 мамырдағы жағдай бойынша елде 12 балалардың сауықтыру ұйымы санитариялық қағидалар мен гигиеналық нормативтердің талаптарына сәйкестігі жөнінде қорытынды алды. Алматы, Павлодар, Түркістан облыстарында – бір-бірден, Ақтөбе облысында – 2, Қызылорда облысында 7 лагерь бар. Сарапшы Санитарлық-эпидемиологиялық бақылау комитетінің жанында «Қауырт желі» (8 (7172) 74-18-64) жұмыс істейтінін, балаларға арналған жазғы сауықтыру ұйымының жұмысында әлдебір кінәрат анықталса, соған хабарласуға болатынын еске салды.Елдос СЕНБАЙ