«Nur Otan» партиясы Ақтау қалалық филиалы Қоғамдық қабылдау бөлмесіне қала тұрғындары көкейдегі түрлі мәселелерін айтып, көмек сұрап келеді.
Қабылдау бөлмесінде «Шығыстаун» тұрғындарының 5 жыл шешімін таппай келген мәселесі де сөз болды. Ұжымдық арызға сәйкес тұрғын-үй құрылысын жүргізген K7-Group мекемесі инженерлік желілерді (тоқ, су, кәріз жүйесі) тиісті мекемелерге өткізбеген. Яғни, орталықтандырылған жүйеге қосылмаған. Бұл тұрғындарға біраз уақыттан бері кедергі келтіріп отыр. Қоғамдық қабылдау өткізген қала әкімінің орынбасары Серік Ғұсман бұл мәселенің анық-қанығын анықтау мақсатында «Nur Otan» партиясы Ақтау қалалық филиалы жанындағы Ақтау партиялық бақылау комиссиясына қайта мониторинг жүргізуге ұсыныс берген болатын. Өз кезегінде партиялық бақылау комиссиясы бұл мәселені дереу қолға алып, тез арада мониторинг тобы құрылды. Жұмыс тобы қатарында «Nur Otan» партиясы Ақтау қалалық филиалы қызметкері Мадияр Қалиасқаров, «Nur Otan» партиясы АҚФ жанындағы партиялық бақылау комиссиясы мүшелері Аида Балқашбайқызы, Шамсадин Гусейнов, Саят Елесбай, Ақтау қалалық мәслихат депутаттары Уайс Ерсайынұлы, Анар Шамшадинова, «Шығыстаун» тұрғын-үй құрылысын жүргізген K7-Group мекемесінің заңгері, Сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің бірінші орынбасары Куаныш Мырзағали және «Шығыстаун» тұрғындары да болды. Қала әкімі Нұрдәулет Қилыбай тұрғындардың арызын назарға алып, мәселені шешуді орынбасары Е.Ізбергеновке және тиісті бөлімдерге тапсырды. Қала әкімдігінің араласуымен мәселе жедел шешіліп жатыр. Яғни, әкімдік тарапынан К7-GROUP құрылыс мекемесіне қысқа уақыт ішінде кездескен кемшіліктерді түзеу бойынша қатаң түрде кеңес берілді. Нәтижесінде, қазір құрылыс жұмыстарының алғашқы кезеңі жүргізіліп жатыр. Атап айтқанда, «КЖСА» МКК, AllianceEnergoSnab ЖШС және Alliance LTD ЖШС тарапынан тиісті жұмыстар қолға алынды. Алдағы уақытта да жұмыстың толық аяқталуы партияның жіті назарында болады.Ә.МАНСҰР