Қызылордада облыстық Ауыл шаруашылығы басқармасының бірнеше қызметкері субсидияны сыбайластықпен үлестірді деген күдікке ілініп, аса ірі көлемде мемлекет қаржысын талан-таражға салғаны үшін қылмыстық іс қозғалды. Бұл қылмыстық істі Қызылорда облысы бойынша Экономикалық тергеп-тексеру департаменті қолға алды.
«Бұл бойынша облыстық Ауыл шаруашылығы басқармасы қызметкерлеріне қатысты Қылмыстық кодекстің 189-бабы 4-бөлігі 2-тармағымен қылмыстық іс қозғалды. Облыстық Ауылшаруашылық басқармасының бірнеше лауазымды тұлғасы өздерінің қызмет бабын пайдалана отырып, келеңсіз жағдайға жол берген. Облыс аумағында 2019-2020 жылдарға арналған бірнеше жоба бойынша инвестициялық субсидия қаражатын үлестіру барысында бірнеше кәсіпкерлік нысандарымен келісімге келген. Сол арқылы аса ірі көлемде мемлекет қаржысын талан-таражға салып, жымқыруды жүзеге асырған. Аталған қызметкерлер бірқатар шаруа қожалықтарында ешқандай жұмыс атқарылмаса да, жабдықтар мүлдем қойылмаса да, олардың толық орындалғаны туралы жалған хаттама толтырып, оған қол қойған. Жүргізілген сот-құрылыс сараптамалары негізінде бірнеше шаруа қожалықтары бойынша мемлекетке келтірілген залал сомасы 26 млн 792 мың теңгені құрап отыр», – деді Қызылорда облысы бойынша Экономикалық тергеп-тексеру департаментінің баспасөз хатшысы Бақыт Орданова. Ведомство мәліметінше, Қылмыстық кодекстің 189-бабы 4-бөлігі 2-тармағы бойынша мұндай қылмысқа жол берген азаматтар белгiлi бiр лауазымдарды атқару құқығынан өмір бойына шектеліп, оларға 7 жылдан 12 жылға дейiнгi мерзiмге бас бостандығынан айыру жазасы көзделген.СОТ ҮКІМІ: 23 МЛН ӨТЕУГЕ 2 АЙ МЕРЗІМ БЕРІЛДІ
Қызылорда облысында теміржол құрылыс материалдарын пайдакүнемдік мақсатта иеліктен шығарып, талан-таражға салған басшыға қатысты сот үкімі шықты. Қаржылық мониторинг агенттігі Қызылорда облысы бойынша Экономикалық тергеп-тексеру департаменті өндірісіндегі кезекті қылмыстық іс бойынша сот үкімі шықты. Мұндай келеңсіздікке «Қазақстан темір жолы ұлттық компаниясы» АҚ-ның Қазалы жол дистанциясының бөлімше бастығы жол берген. Ол теміржол құрылыс материалдарын пайдакүнемдік мақсатта иеліктен шығарып, талан-таражға салған. Осылайша, оларды жымқырған. Салдарынан Қызылорда магистральді желі бөлімшесіне 23 млн теңге үстінде залал келтірілген. Бұл азаматтың жауапкершілігіндегі тауарлы-материалдық құндылықтардың жетіспеушілігі жүргізілген аудиторлық тексеру кезінде анықталған. «Арал аудандық соты Қылмыстық кодекстің 195-бабы 4-бөлігі 2-тармағы бойынша үкім кесті. Онда алдау немесе сенімді теріс пайдалану жолымен аса ірі мөлшерде мүліктік залал келтіру жағдайы көрсетілген. Сотталушыға, материалдық жауапкершілікпен байланысты қызметпен айналысу құқығынан екі жылға айыра отырып, екі жыл бас бостандығынан шектеу жазасы және осы мерзімге пробациялық бақылау тағайындалды», – деді Қызылорда облысы бойынша Экономикалық тергеп-тексеру департаментінің баспасөз қызметі. Зардап шегуші «Қазақстан темір жолы ұлттық компаниясы» акционерлік қоғамының Қызылорда магистральді желі филиалының пайдасына 23 миллион 152 мың теңгені өз еркімен төлеу үшін сотталушыға 2 ай мерзім белгіленгенін айтады ведомство өкілдері.Нұрсұлтан ҚАЗБЕК, Қызылорда облысы