Келесі аптада вакцина алған барлық қазақстандыққа Ashyq қосымшасында «жасыл» мәртебе беріледі. Бұл туралы ОКҚ-да өткен брифингте Цифрлық даму, инновациялар және аэроғарыш өнеркәсібі министрі Бағдат Мусин айтты.
«Келесі аптаның басында вакцина салдырғандардың бәрі Ashyq қосымшасында «жасыл» мәртебеге ие болады деген жоспар бар», - деді министр.
Ashyq – қоғамдық орындарға баратын адамдарды тіркеуге арналған қосымша. Нысанға кірмес бұрын пайдаланушы арнайы QR-кодты сканерлейді де, оны кіреберісте тұрған әкімшіге көрсетеді. Код келушінің мәртебесін анықтайды. Ал азаматтардың мәртебесі Денсаулық сақтау министрлігіндегі мәліметтер базасымен салыстырғаннан кейін белгілі болады.
