Сенаторлар Каспий бойынша көршімізбен арадағы көші-қон ынтымақтастығы келісімін ратификациялады. Құжат Президенттің қол қоюына жіберіледі. Мәулен Әшімбаевтың төрағалығымен өткен Сенат отырысында палата депутаттары Қазақстан мен Әзербайжан үкіметтері арасындағы «Көші-қон саласындағы ынтымақтастық туралы келісімді ратификациялау туралы» заңды қарап, қабылдады.
Бұл келісім көші-қон саласындағы екіжақты ынтымақтастық үшін құқықтық негіз қалыптастырады және заңсыз көші-қонға қарсы іс-қимыл бойынша бірлесіп әрекет етуді көздейді. «Осы құжат арқылы Әзербайжанда жүрген азаматтарымыздың мүдделерін тиісті деңгейде қорғау үшін қосымша мүмкіндіктер ашылады. Алдағы уақытта бұл заң көші-қон саласын реттеп, екі ел арасындағы ынтымақтастықты одан әрі дамытуға оң септігін тигізеді деп сенеміз», – деді Мәулен Әшімбаев. Сонымен қатар отырыс барысында сенаторлар депутаттық сауалдарын жолдады. С.Ершов азаматтық қорғаныс органдарын материалдық-техникалық қамтамасыз етуді және ондағы қызметкерлердің әлеуметтік жағдайын жақсарту мәселесін көтерді. Ал Ә.Нұралиев еліміздегі экология проблемаларына назар аударып, оларды шешу жолдарын ұсынды. Себебі еліміздегі қатты тұрмыстық қалдық полигондарының 82%-ы экологиялық және санитарлық нормаларға сәйкес келмейді. Қазір еліміздегі 3 мыңнан астам полигонда 125 млн тоннадан аса қатты тұрмыстық қалдық жиналған.Елдос СЕНБАЙ