«Nur Otan» партиясы Атырау облыстық филиалының Саяси кеңесі бюросы мәжілісінде «Jas Otan» Жастар қанатының «Жастар – Отанға!» бағдарламасын іске асыру жөніндегі «Жол картасы» бекітілді.
Аймақ басшысы Махамбет Досмұхамбетов жиында «Елбасы, «Nur Otan» партиясының Төр- ағасы Нұрсұлтан Назарбаевтың «Nur Otan партиясы Саяси кеңесінің 2019 жылдың 21 тамызында өткен кеңейтілген отырысында берген тапсырмасына сәйкес, «Жастар – Отанға!» бағдарламасы әзірленген. Қазақстан Президенті Қасым-Жомарт Тоқаев жастар мәселесін дер кезінде шешу мен қолдаудың маңызын атап, оларға әрдайым ерекше көңіл бөліп келеді», – деп осы тұрғыда «Jas Otan» жастар қанатының маңызын атап өтті. «Nur Otan» партиясының жастар қанаты – 20-жылдық тарихы бар «Jas Otan» еліміздегі барлық санаттағы азаматтардың мүддесін білдіретін ең ірі жастар ұйымы ретінде жас қазақстандықтардың жан-жақты дамуы мен өзін-өзі қалыптастыруы үшін жағдай жасауды өзінің негізгі мақсаты етіп келеді», – деді облыс әкімі. «Nur Otan» партиясы Атырау облыстық филиалы төрағасының орынбасары Арман Азаматов: «Бағдарлама жас қазақстандықтарды ел дамуының ортақ мақсаты төңірегінде біріктіруге және жастардың өзін-өзі дамытуы үшін жан-жақты қолдауды қамтамасыз етуге бағытталған. Бағдарлама әртүрлі санаттағы жастардың мүддесін қамтиды және әлеуметтік зерттеулер мен сауалнамалардың нәтижелеріне сүйенеді», – деген Арман Серікұлы жастардың әртүрлі топтарымен елуден астам кездесу өткізіліп, нәтижесінде жүзден астам нақты ұсыныстар сараланып алынғанын жеткізді. Таратып айтсақ, «Сапалы білім» бағытында «Таза сессия», жастарды ағылшын тіліне оқытуды ұйымдастыру, «Жұмысқа орналастыру және жұмыспен қамту» бағыты бойынша «Жас кәсіпкер» жобасы қарастырылған. Сондай-ақ «Жас отбасыларды қолдау және қолжетімді баспана» бағыты бойынша «Бақытты отбасы» жобасы және «Тұлғалық даму және бос уақытты тиімді өткізу» бағытында Excursion day, «Жайлау life» сияқты жобалар жол картасына енгізілген. Бұлар бойынша барлығы 280 кешенді іс-шараны жүзеге асыруға жоспарлар құрылып, 130 индикатор айқындалған. Айтарлығы, аталған бағдарламаны дайындауға сауалнама жүргізу үшін облыстың жүз отыз мың жасы қамтылған. Кеңес отырысында өңірлердегі шағын және орта бизнес басшылары, өздері басқарып отырған салалары бойынша жастарды оқытып, еңбекке баулып, келешегіне жол ашуға болатын ұсыныстарын айтып жеткізді. Сайып келгенде, елдің болашағы жастар үшін мемлекетімізде барлық жағдай жан-жақты қарастырылған. Енді соны ұтымды пайдаланып, білім мен тәжірибе арқылы келешекке нық қадам басу ғана тұр.Т.ЖҰМАБЕКҚЫЗЫ, Атырау облысы