«Nur Otan» партиясының Батыс Қазақстан облыстық қоғамдық қабылдау бөлмесінде облыстық мәслихат депутаты Тұрарбек Тлемісов тұрғындарды қабылдады.
Қабылдауға жазылған әрбір азамат назардан тыс қалмай, әрқайсысына түсініктеме мен кеңес берілді. Қабылдауда бейнебайланыс арқылы жалғызбасты ана мүмкіндігі шектеулі қызымен бірге көпқабатты үйде тұратынын баяндап, қызының күнделікті қозғалысына, емдеу шараларына баруға, жоғары қабаттан төменге түсіп, жүріп-тұруына көмек сұрап, хабарласты. Қызын жалғыз өзі көтеріп, түсіріп жүре алмайтынын айтты. Хабарласқан тұрғынның байланыс деректерін жазып алып, Тұрарбек Тлемісов жергілікті еріктілерге сауал жолдады. Анамыздың жағдайы егжей-тегжейлі түсіндіріліп, көмекке еріктілердің күші жұмылдырылатын болды. Келесі хабарласқан тұрғын, үйінің маңайында орналасқан «Белгілі тұрғылықты жері жоқ тұлғалар үшін әлеуметтік бейімделу орталығының» алдында келушілердің көптеп жиналуы тұрғындарды алаңдатып отырғанын мәлімдеді. Тұрғылықты мекенжайы жоқ келушілердің теріс қылықтары балаларға кері әсерін тигізеді деп алаңдайтынын хабарлады. Тұрғындар бұл мекемені өзге мекенжайға ауыстыруын сұрады. Мәлімделген барлық жағдай назарға алынып, тиісті мекемелерге сауал жолданды. Бұл мәселе депутаттың толық бақылауына алынды. Сондай-ақ қабылдауға оффлайн форматта келген тұрғындар болды. Көпбалалы ана тұрғын үй мәселесімен келді. Қазір қалада жалдамалы пәтерде тұрып жатыр екен. Ауданда апатты үй кезегі бойынша 26-орында тұрғанын айтып, бірақ кезегі бойынша әлі үй ала алмай жүргенін атап өтті. Депутат заңнамалық тұрғыдан барлық түсініктемелер берді. Аудан тұрғынының барлық байланыс деректерін жазып алып, тиісті мекемелерге депутаттық сауал жолданды. Қабылдау кезінде Тұрарбек Тлемісов тұрғындардың өтініштерін тыңдап, қолданыстағы заңдарға сәйкес түсініктеме мен консультативтік-құқықтық кеңес берді.Әбілмансұр ЖАСАН