Шымкентте Қазақстанның Мемлекеттік рәміздер күні мерекесіне орай эстафета түрінде автокөліктер шеруі басталды. Іс-шараны ұйымдастыруға «Nur Otan» партиясы Шымкент қалалық филиалы жанындағы «Jas Otan» Жастар қанаты атсалысты.
Іс-шараның мақсаты – мемлекеттік рәміздердің еліміздің дербестігі мен тәуелсіздігін бүкіл әлемге танытушы әрі мемлекетіміздің өткені мен бүгіні және болашағы арасындағы сабақтастықтың жарқын көрінісі екенін, сондай-ақ халқымыздың мұқалмас рухын, қаһармандығы мен даналығын, асқақ арман-тілегін жеткізетін құнды белгі ретінде таныту. Эстафетаны алғаш болып Шымкент қалалық мәдениет үйінің басшысы Сәкен Майғазиев бастады. Қолына көк Туды алып, 12 өнерпазбен бірге көлікпен қала көшелері арқылы «Арбат» демалыс аймағына жол тартты. Ол жерде «Қазақстанға еңбегі сіңген спорт шебері», бокстан Әлем чемпионы, Олимпиада ойындарының қатысушысы Біржан Жақыповқа эстафетаны жолдады. Әрбір белгіленген орында тұрғындарға «Nur Otan» партиясы Шымкент қалалық филиалы жанындағы «Jas Otan» Жастар қанаты мүшелері рәміздерге байланысты сұрақтар қойып, жеңімпаздарға QAZAQSTAN шоколадын табыстайды. Кең баба саябағында спортшы эстафетаны №1 қалалық клиникалық аурухананың бас дәрігері Абылай Донбайға ұсынды. Кейіннен шеру Асар шағынауданында «Үздік педагог-2020» жеңімпазы Жадыра Шабденге табысталып, одан ары «Шымкент Ситиді» айналып өтіп, әкімшілік іскерлік алаңына қарай жол тартады. Ол жерде бүгінгі күннің батыры, №1 мамандандырылған өрт сөндіру бөлімінің өрт сөндіруші-құтқарушысы, азаматтық қорғау кіші сержанты Вахиджан Казакбаевқа табысталады.Әбілмансұр ЖАСАН