Археологиялық қазба жұмыстарын жүргізуге рұқсат алған Х.Досмұхамедов атындағы Атырау университетінің археологиялық экспедициясы сармат жауынгерлерінің сүйегін тапты.
Археологиялық экспедиция Қызылқоға ауданындағы Мұқыр ауылдық округінің аумағында орналасқан темір дәуіріне жататын қорғандарды зерттеуде олжалы оралды. «Мәдениет және спорт министрлігінің арнайы лицензиясымен біздің университеттегі Х.Табылдиев атындағы Каспий өңірінің тарихы, археологиясы және этнологиясы ғылыми-зерттеу институты қазба жұмыстарын жүргізуді бастап кетті. Құрамында 3 ғылыми жетекші мен 20 студент бар экспедиция Мұқыр ауылдық округіне қарасты Қарақұдық участогіндегі қорғандарға қазба жұмысын жүргізді. Қазба жұмысы кезінде тарихи жәдігердің үстінен түстік. Мұнда сармат дәуіріне жататын жауынгерлердің сүйегі табылды», – дейді аталған ғылыми зерттеу институтының директоры, тарих ғылымдарының докторы Сайфолла Сапанов. Бір қорғаннан үш жауынгердің бірінің тұсына қару-жарақтары мен 2 мың жыл бұрынғы құмыра табылған. Қорғанда найза, белдікте пышақ, бір қорап жебе болған. «Археологиялық экспедицияның бірінші кезеңінде бір қорғаннан осындай жәдігерлерді таптық. Бір қорғанда 3 адамның жерленуі археологияда сирек кездеседі. Мұны біз сармат дәуіріндегі жауынгерлер деген тұжырымға келдік. Бір жауынгердің оң қолының білектен кесілгеніне қарағанда, соғыста қаза табуы мүмкін. Сол себепті енді жауынгерлердің сүйегіне антропологиялық зерттеу жүргізіледі», – дейді археологиялық экспедиция жетекшісі С.Сапанов. Айтарлығы археологиялық экспедицияның екінші кезеңіне археологтер тартылмақ. Соның бірі Б.Городивиков атындағы Қалмақ мемлекеттік университетінің профессоры, тарих ғылымдарының докторы Петр Кольцов экспедиция құрамына қосылып, қорғаннан табылған сармат дәуіріндегі жауынгерлердің сүйегіне, өзге жәдігерлерге ғылыми-зерттеу, талдау жүргізеді.Тұрсын ЖҰМАБЕКҚЫЗЫ, Атырау облысы