Мәжіліс Спикері Нұрлан Нығматулиннің төрағалығымен өткен палатаның бюросында алдағы жалпы отырыстың күн тәртібінің жобасы қалыптастырылды. Келесі аптадағы жиында депутаттар қарауына бірқатар халықаралық келісімді ратификациялайтын заң жобаларын қарау ұсынылмақ.
Атап айтқанда, талқылауға Еуразиялық экономикалық одақ туралы шартқа Армения және Қырғыз Республикаларының қосылуына байланысты өзгерістер енгізетін хаттаманы ратификациялау туралы заң жобалары шығарылады деп жоспарланып отыр.
Сонымен қатар күн тәртібінің жобасында мемлекеттік сатып алу мәселелері туралы заңнамалық түзетулерді II оқылымда қарау көзделген.
Бұған қоса, жалпы отырыста палата Қазақстан мен Ресей арасындағы әскери ынтымақтастық туралы шартты және Тәуелсіз Мемлекеттер Достастығына қатысушы мемлекеттердің қарулы күштерінің бірлескен байланыс жүйесі туралы келісімді ратификациялауға қатысты заң жобаларын жұмысқа алады, ол бойынша бейінді комитеттің қорытынды әзірлеу мерзімдерін бекітеді.
Айхан ШӘРІП