Жамбылдағы атыс: дәрігерлер оққа ұшқан бес жігіттің денсаулығы туралы айтты

Жамбыл облысында 22 жастағы жігіт 16-калибрлі қарумен 5 адамды атты. Оқиға Сарысу ауданы Саудакент ауылында болған. Бұл туралы AstanaTV хабарлады.

Полицейлердің айтуынша, ауыл жастарының арасындағы ерегістің аяғы атысқа ұласқан. 22 жастағы жігіт сол жерде топ болып тұрғандарға қарай оқ атқан. 5 адам жараланды. Олар ауруханаға жеткізілді. Басына оқ тиген екі жігіттің жағдайы ауыр, жансақтау бөлімінде жатыр.

Қалалық көпбейінді ауруханасы жансақтау бөлімінің меңгерушісі Гамзад Мұсаев: «Түскен кезде бір науқастың жағдайы ауыр болған. Миына операция жасап, миындағы ұйыған қан алынды. Есін біледі. Жағдайы тұрақты ауыр. Екінші науқас консервативно операциясыз емделіп жатыр. Қазіргі таңда ем қабылдап жатыр», – деді.

Оқ атқан жігіт қамауға алынды. Сотқа дейінгі тергеу жүріп жатыр.

Облыстық ПД криминалдық полиция бастығы Ардақ Мәдімаров: «Бұзақылық ниетпен «Бірнеше адамды өлтіруге оқталу» бабы бойынша іс қозғалды. Бұл азаматтардың арасында жанжал болғандығы анықталды. Содан кейін күдікті оларға қарай оқ атқан. Ол жедел іздестіріліп ұсталды. Қылмысын мойындап, уақытша ұстау изоляторына қамалды», – деді.

Кеше Жамбыл облысында жанжал соңы атыспен аяқталғанын жазған болатынбыз.

Байқау айқын
Байқау айқын
Aikyn.kz | Бүгінгі жаңалықтар. Әлем және Қазақстан жаңалықтары.