Ескелді ауданының орталығы Қарабұлақ ауылында «Жетісу – Ұлы Жібек жолының басты қақпасы» атты қолөнершілердің қайырымдылық көрме-жәрмеңкесі өтті. Орталық алаңда түрлі туындылар қойылған көрмеге облыстың елге танымал 20-дан астам шебері өз қолымен жасаған түрлі бұйымдарын ұсынды.
Ел Тәуелсіздігінің 30 жылдығына арналған көрме-жәрмеңкені Ескелді ауданының әкімдігі бастамасымен «Алтын Адам Жетісу шеберлер орталығы» қоғамдық бірлестігі, Алматы облысының іскер әйелдер кеңесі, Алматы облысы Кәсіпкерлер палатасының аудандық филиалы және «Алпамыс» мүгедектер қоғамдық бірлестігі бірлесіп ұйымдастырды.Жәрмеңкеге облыстың түкпір-түкпірінен келген шеберлер қатысып, түрлі зергерлік, киіз және жібек бұйымдарын, тоқыма және былғары заттарды, музыкалық аспаптарды, ат әбзелдерін, картиналарды ұсынды. Жиналған қаражаттың бір бөлігі киіз бұйымдарына арналған шикізат сатып алу үшін ерекше қажеттіліктері бар шеберлерге көмекке берілетін болды. Жәрмеңкеге қатысушылардың бірі – талдықорғандық ұлттық нақыштағы әшекейлер жасайтын шебер Сәуле Жүлкеева зергерлік бұйымдарды табиғи тастардан жасайды. Идея мен дизайнды әртүрлі техникадағы жұмыстарға қарап өзі ойлап табады. Барлық өнімдері заманауи дизайндағы шығыс және ұлттық стильде әзірленген. Әрбір бұйым бірегей, қайталанбайды деп айтуға болады, өйткені олар қолмен істелген. Ал Сарқан ауданының тұрғыны Светлана Бестюбаева өзі қатысып отырған алғашқы көрмеге қыз жасауын, көрпелер, жастықтар, кілемдер әкеліпті. Бірнеше жыл бұрын көрпе тігіп, қыздарына жасау дайындаған оның тіккендерін көрген туыстары мен таныстары тапсырыс бере бастайды. Осылайша, хоббиі кәсіпке айналған. «Еңбек» мемлекеттік бағдарламасы бойынша кәсіпкерлік негіздерін оқып, бизнес ашуға грантқа қол жеткізіп, оған тігін машинасы мен құрал-саймандар сатып алған. Содан бері жеке ісін жүргізіп келеді. Көрме жұмысы аясында шеберлік сыныптары, ұлттық киімдер көрсетілімі және концерттік бағдарлама ұйымдастырылды.«Көрменің мақсаты – қолөнерді дәріптеу, оны халық арасында танымал ету, қолөнершілерге тәжірибе алмасуға жағдай жасау. Көптеген шеберлер мемлекеттік бағдарламалардың қатысушылары, соның арқасында өз ісін дамытып, шеберлік сабақтарын өткізеді. Сондай-ақ олар ұлттық қолөнерді ары қарай жалғастыру және сақтау үшін балалары мен немерелеріне үйретеді. Облысымыздағы көптеген қолөнершілер «Алтын адам Жетісу шеберлер орталығы» қоғамдық ұйымына бірігіп, ұлттық өнерді бұқараға тарату бастамасына қуана қосылды», – деп атап өтті Алматы облысы іскер әйелдер кеңесінің төрайымы Римма Салықова.
Шарапатты шараның ашылу салтанатына арнайы келген аудан әкімі Рустам Әли: «Халықтық қолөнер – ұлттық мәдениет пен туризм индустриясының ажырамас бөлігі. Елдегі туризмнің дамуын, туристік орындардың танымалдығының артуын ескерсек, алдағы кезде қолөнершілік ел ішінде кең тарала бастайтыны сөзсіз. Бұл үрдіс тек күшейе түседі және біз ұлттық қолөнерді ілгерілету үшін түрлі алаңдарды ұсына отырып, жаңа деңгейге көтеруіміз керек», – деді.
Болат АБАҒАН, Алматы облысы