Полицейлер өзіне-өзі қол жұмсамақ болған қызды құтқарып қалды
Полицейлер өзіне-өзі қол жұмсамақ болған қызды құтқарып қалды
Фото: Polisia.kz
Қарағандылық полицейлер көпірден секірмекші болған қызды өлім аузынан аман алып қалды. Тәртіп сақшылары оны соңғы минутта қайғылы жағдайдан құтқарды. Заречный кентінің маңында Шығыс айналма жолында тәртіп сақшылары жол жиегінде адамды байқаған. Жақындағаннан кейін олар көпір қоршауының артында тұрған қызды көрген. Полиция қызметкерлері оның есімін біліп, көмек керек пе деп сұраған. Қыз өз есімін айтып, оны жалғыз қалдыруын өтінген. Тәртіп сақшыларына ол өз-өзіне қол жұмсайтынын айтқан. Полицейлер қыз көпірден секірмек болғанда, көмектесіп үлгерген. «Қыз ішімдік ішкен, онымен байланыс орнату өте қиын болды. Біз оны әңгімеге тартуға және оны қоршаулардан алыстатуға тырыстық. Соңғы сәтте қолынан ұстап алып, жолдың бергі жағына тартып шығардық», - деп хабарлады полиция капитаны Жұмақас Нұржан. Полиция қызметкерлерінің кәсібилігінің арқасында өзіне-өзі қол жұмсау әрекетіне жол берілмей, қыз құтқарылып, медицина қызметкерлерінің қолына тапсырылды.