СҚО-да балық аулап отырған 67 жастағы тұрғынды бұқа сүзіп өлтірген.
СҚО полиция департаменті баспасөз қызметінің мәліметінше, 10 шілде күні Есіл ауданында 60 жастағы ер адам аттан құлап мерт болды. Ақжар ауданында симментал бұқасы балық аулап отырған 67 жастағы балықшыға шабуыл жасаған. Біраз уақытқа малды иесіз қалдырған бақташы қайтып келгенде жаралы ер адамның үстінен шыққан. Ауыр жарақат алған ауыл тұрғыны аудандық ауруханада қайтыс болды.
Аталған фактілер бойынша аудандық полиция бөлімдерінің қызметкерлері тексерістер жүргізіп, сараптамалар тағайындады.
Ақжар ауданындағы оқиға малды қараусыз қалдыру қауіпті екенін тағы да көрсетіп отыр. Бақташы денсаулыққа зиян келтіруге әкеп соқтырған, мал жаю ережелерін бұзғаны үшін ҚР Әкімшілік құқық бұзушылық туралы кодексінің 408-бабы 2-бөлігі бойынша жазаланды. Жалпы жыл басынан бері осы бап бойынша 1229 хаттама толтырылды.
«Иесі анықталғанға дейін арнайы қамау орындарына 3225 мал қамалды. Облыс тұрғындарын заңнама талаптарын сақтауға, малдың еркін жайылуына жол бермеуге және малды бағу кезінде сақ болуға шақырамыз», – дейді СҚО полиция департаменті жергілікті полиция қызметі басқармасының бастығы Айдын Байматов.
