Облыста оқушылардың білімі мен олардың қауіпсіздігі әрдайым басты назарда. Ал балаларға қосымша білім берудің де алар орны ерекше. Өйткені қосымша білім беру баланың білім алуы мен шығармашылық дамуына жағдай жасайды. Өңірдегі балаларды жан-жақты дамыту мен уақытын тиімді пайдалану мақсатында мыңнан астам балаға тегін үйірмелерге қатысуға барлық жағдай жасалған. Осы мақсатта биыл мемлекеттік шығармашылық тапсырысқа бөлінген қаржы 170 млн теңгеден асқан.
Бүгінде 4 пен 17 жас аралығындағы 1 090 бала тегін секцияларға қатыса алады, жыл соңына қарай 1 558-ге дейін артады. Өтінімдерді тіркеу үшін artsport.edu.kz портал жұмыс істейді. Қазір 577 бала тіркелген. Олардың көпшілігі сурет салуды таңдады, 35 қыз балетпен айналысуды таңдаса, 12 бала домбыра ойнауды үйренгісі келген. Қолжетімді үйірмелер қатарына би, бейнелеу өнері, сәндік-қолданбалы өнер, театр, кино клубтары, вокал, музыкалық бөлімдер, әдеби клубтар және заманауи өнер индустриясының студиялары кіреді. Қазір жеке студиялардың иелері мемлекеттік тапсырысқа қатысу үшін тіркеу рәсімінен өтіп жатыр. Бұл жерде қатаң талап пен өзіндік ереже бар. Осыған дейін қызмет көрсетуге ниет танытқан 62 өтінімнің тек сегізі ғана жұмысқа жіберілді. Ал аймақта жаңа оқу жылына дайындық басталып кетті. Жақында Маңғыстау облысының әкімі Серікбай Трұмовтың төрағалығымен өткен аппараттық жиында облыс мектептерінде қауіпсіздікті қамтамасыз ету мәселесі қаралды. Өңірде үш ауысымда оқытатын мектептердің үлесін азайту үшін биыл үш мектеп құрылысы мен үш мектептің қосымша құрылысын аяқтау жоспарланып отыр. «Ақтау қаласының 34 шағынауданында 1 200 орындық мектеп және Шығыс-1 шағынауданында 300 орындық мектеп іске қосылғаннан кейін №28 және №29 мектептерде үш ауысым мәселесі шешіледі», – деді облыс әкімінің орынбасары Гүлмира Қалмұратова. Облыста апатты мектептер жоқ. Қазір мектептерде 12 451 орын тапшылығы бар, ал 15 мектепте бастауыш сыныптардың 3 826 оқушысы үшінші ауысымда оқиды. Жол картасын іске асыру барысында 2025 жылға дейін 28 нысан іске қосылады. Г.Қалмұратованың айтуынша, 1 жастан 6 жасқа дейінгі балаларды мектепке дейінгі тәрбиемен және оқытумен қамту үлесі — 66%. Қазір балабақшалар желісі жеке сектордың арқасында артып жатыр. Осы орайда облыста алдағы бес жылда 102 балабақша ашу жоспарланып отыр, олардың барлығы жекеменшік болмақ. Биыл 1 490 орындық 19 жекеменшік балабақша ашылуы тиіс. Бүгінде 800 орындық 13 балабақша пайдалануға берілді. Қалған алтауы жыл соңына дейін ашылады. Өңірдегі барлық білім беру ұйымдары бейнебақылау жүйесімен қамтамасыз етілген. Былтыр осы мақсатта жергілікті бюджеттен 125,6 млн теңге бөлінді. 94 мектептегі бейнебақылау жүйесі қолданыстағы нормаларға сәйкес келтірілген. 45 мектепте дабыл түймелері орнатылды. Облыстағы 51 балабақша, 43 мектеп және 9 колледжде мамандандырылған күзет бар, 98 мектепте штаттық кестеге сәйкес вахтер және күзетші жұмыс істейді. Облыс әкімі С.Трұмов орынбасары Г.Қалмұратоваға, Полиция департаменті мен білім басқармасының басшыларына жаңа оқу жылына дейін балалардың қауіпсіздігін қамтамасыз етуге бағытталған барлық жұмыстарды аяқтауды тапсырды.Мәдина ЖӘЛЕЛҚЫЗЫ, Маңғыстау облысы