Құрылғанына үш жыл болған еліміздегі үшінші мегаполис саналатын Шымкент қаласы күн сайын көркейіп, дамып келе жатыр деп мақтанып жүрміз. Шынтуайтына келгенде көркейіп жатқан – қаланың орталығы. Ал қала шетіндегі елді мекендердің тұрғындары әлі күнге дейін ауыл мәртебесінен аса алмай келеді. «Қалалық болғанымызбен, күніміз ауыл тұрғындарынан да нашар», – дейді олар.
Жақында Абай ауданының әкімі Б.Парманов Ынтымақ елді мекенінде болып, жыл басынан бергі атқарылған жұмыстар бойынша халық алдында есеп бермек болған. Жергілікті билік өкілдері қаланың даму барысы, Ынтымақтағы қарқынды құрылыс жөнінде сөз қозғады. Жұмыстың ауқымы, қызу тірлік, жұмысшылардың тынымсыз еңбегі туралы да атап өтті. Алайда елді мекен тұрғындары биліктің есебін тыңдамай айқай-шу шығарды. Ашынған халық айтылып жатқан деректердің барлығы көзбояушылық деп қабылдады. Шенеуніктердің сөзі жиналғандардың одан сайын ашу-ызасын тудырды. «Осы алдап келгендеріңіз жетер. Уәделеріңізге тойдық. 10 жылдан асты, әлі күнге дейін алдап келе жатсыздар. Осында біраз күн тұрып көрсеңіздер, біздің қалай өмір сүріп жатқанымызды білетін едіңіздер. Сапалы электр энергиясының жоқтығынан желдеткішті де қоса алмай отырмыз. Ауызсудың да мәселесі шаш етектен. Қақаған қыстағы азап өз алдына, шіліңгір шілдеде де инфрақұрылымның нашарлығынан зардап шегіп отырмыз», – деп шағымданды тұрғындар. 20 мыңнан астам тұрғыны бар Ынтымақ шынында кенже қалып барады. Олар сығырайған электр қуатын жекеден алады, табиғи газ мүлдем жоқ. Ауызсудың тапшылығы өз алдына бөлек әңгіме. Аптасына бір мәрте ауылға су таситын көлік келеді екен. Әр отбасына 400 литрден таратылатын судың өзіне кейде іліге алмай қалатындар бар. Алып қалғандардың өзі жаздыгүні 400 литрді жеткізе алмай, одан қалса, су сақтайтын ыдыстары тез бұзылып, құрттап кетіп жатады екен. Сол себепті мұндағылар негізінен 5-10 литрлеп дүкеннен су сатып алуға мәжбүр. Ал ақша үнемдеп, су ала алмай қалған күндері тіптен қиын.Әбден ашынған халық жергілікті билік өкілдерін сөйлетпей тастады. Қағаз жүзінде барлығының да керемет болғанымен, алайда қала тұрғындары әлі де жарықтың, судың, табиғи газдың азабын тартып келе жатқанын бірінен соң бірі жеткізіп жатты. Электр қуатын жекеменшіктен алатын болған соң оның бағасы да жоғары. Одан бөлек, жел үп етсе жарық жалп етіп өшеді. Электр энергиясы әлсіз болғандықтан желдеткішке қуаты жетпей жатады. Сонымен қатар «талай телевизор мен тоңазытқышты күйдірген», – дейді тұрғындар. Осындай өздерін азапта тұрып жатырмыз деп есептейтін тұрғындарға әкімнің бәрі керемет деп есеп беруі шынында қисынға келмейді. Әкімдік қызметкерлері дау-жанжалға ұласқан есеп беру жиынында түрлі сылтауларды айтып, абдырып қалды. Абай ауданының әкімі Бұхарбай Парманов қараша айының соңында барлық мәселені толықтай шешетінін айтып, уәде берді. «Қазір Ынтымақта ішкі жүйенің 90 пайызы толық игерілді. Енді 10 пайызы қалды. Алайда бұл жерде мәселе орталық сумен қамту болып тұр», – деп күмілжіді Бұхарбай Парманов. Шенеуніктер шалғайдағы елді мекенде жуырда асфальт төсеу мәселесінің шешімі табылатынын жеткізді. «Келесі келгенде, асфальт жол үшін алдарыңызда қызармайтын боламыз» деп сендірді. Иә, жалған есеп пен жартыкеш жауап, құрғақ уәде тұрғындарды әбден мезі еткен болуы керек. Тұрғындар дәл мына қарқынмен бұдан кейін де құрғақ уәдені ары қарай тыңдай бермесі анық. Қалай болғанда да, енді биліктің білек сыбанып, инфрақұрылым мәселесін тез арада шешпеске лажы қалмаған сияқты...Құралай Байтұрсынова көше басындағы үйінің өртеніп кеткенін айтады. «Өте үлкен үй еді. Өрт шыққанда бір шелек те су таппай қалдық. Көршілерде де су жоқ екен. Бір сағатқа жуық жанды. Өрт сөндірушілер келгенімен үйді сақтап қала алмады, толығымен жанып кетті», – дейді ол.
Назгүл НАЗАРБЕК, Шымкент қаласы