Өткен аптада Атыраудағы «Дина» базарында вакцинаның екінші компонентін алған шетелдік азаматқа қатысты мән-жай анықталды. Шетел азаматы Атырау қаласындағы №3 ауруханада коронавирусқа қарсы вакцинаның бірінші компонентін салғызған 22 жастағы Өзбекстан азаматы өтірік талып, құрысып-тырысып шу шығарған. Кейін оның вакцинаға қарсы пікір қалыптастыру үшін шу көтергені белгілі болды.
№3 қалалық емхана меңгерушісі Айман Өтегенова «тәртіп бұзушыны жауапқа тартуға қатысты Полиция департаментіне арыз жолдаймыз» деген болатын. Атырау қалалық Полиция басқармасы бастығының бірінші орынбасары Е.Биғамбаевтың айтуынша, дәрігерлердің арызы қабылданды, медицина қызметкеріне дөрекілік танытып жұмысына кедергі келтірген Өзбекстан Республикасының азаматына қатысты Әкімшілік құқықбұзушылық туралы кодекстің 434-бабы (ұсақ бұзақылық) бойынша хаттама толтырылып, шетел азаматы мен жұмыс беруші 1 күн қамауға алынған.Өзбек азаматының аяқ-қолы құрысып жанталасқанын көріп оған көмекке келген қала тұрғыны Мұхтар Әулетовтың айтуынша, вакцина алған азамат шынымен де талықсып, қол-аяғы сіресіп қалған. «Ұят қой, өтірік емес. Оның аяқ-қолын уқалау кезінде өз-өзіне келіп, қайта талықсып кеткені рас. Болғанды болды деп шындықты айту керек. Қайта-қайта жедел жәрдем шақырдық, олар хәлі нашар жігітті алып кетті», – деді куәгер. Алайда №3 емхана дәрігері Айгүл Үсенбаева: «Екпеден соң дәрігерлер бақылауында болды. Вакцина алды деген анықтама сұрады. Кейін өзінің жұмыс берушісін ертіп келіп шу шығарды. Вакцина паспорты ертең дайын болады деп айттық. Алайда вакцина алуға келгендерге «Бұл жерде вакцина алмаңыздар» деп үгіттеді», – деді.Сайып келгенде, Өзбекстан азаматының аяқ-қолы құрысып жатуын вакцина алуға қарсылық деген мәселемен полицияға ешкім арызданбаған.
Тұрсын ЖҰМАБЕКҚЫЗЫ Атырау облысы