Аймақтардағы ауыл әкімдерін сайлау қорытындысы жарияланды. Жалпы, дауыс санау уақытты көп алмағанымен, сайлауалды ұйымдастыру жұмысымен айналысқан аумақтық сайлау комиссиясы бір жүйеге орталықтандырылмаған.
Белгілі болып отырғандай, әзірге облыстардағы сайлау қорытындысы бойынша «Nur Otan» партиясынан – 627 (86%), Ауыл – 33 (4,4%), ADAL – 15 (2,1%), Ақжол –11 (1,5%), ҚХП – 10 (1,4%), ЖСДП 1 (0,1%) адам өтіп отыр. Сондай-ақ сайлау науқанына партиясыз өз-өзін ұсынған 33 адам қатысқан. Сарапшы Никита Шаталов республика бойынша жиынтық ақпаратты ресми түрде ешкім жарияламайтынын айтты. «Бұған дейін «Nur Otan» партиясы 80%-дан кем орын алмайтыны туралы айтылған болатын. Бірақ билеуші партияның мүшелері болған өз-өзін ұсынушылардың арқасында жоспарды артығымен орындау болған секілді.Мен оны алдын ала болжаған едім», – дейді Никита Шаталов. Оның айтуынша, «Nur Otan»-ның жалпы тізімінде 65 азамат өз-өзін ұсынған. «Өз-өзін ұсынғандардың көпшілігі жұмыс істеп жүрген әкімдер, мемлекеттік қызметкерлер, түрлі бюджеттік және коммуналдық кәсіпорындардың басшылары, яғни билеуші партияның электораты. Шын мәнінде, облыстардағы жағдай осындай. Мысалы, Ақмола облысындағы 95 орынның 74-і нұротандықтарға тиесілі. Өз-өзін ұсынған 14 адамның 11-і дәл қазір жұмыс істеп жүрген әкімдер. Әрі олар «Nur Otan» бастауыш партия ұйымдарының басшылары. Тағы 2-еуі белсенді мемлекеттік қызметкерлер», – дейді сарапшы. Дегенмен айтарлықтай тосынсыйға толы өзгеріс болмағанымен, партиялар арасында тартыс болды. «Nur Otan» әдеттегідей басымдыққа ие болса, ADAL партиясының сайлаушылары бұл жолы ҚХП мен Ақжолдан қарағанда көбірек белсенділік танытты. Өз-өзін ұсынғандар «Ауыл» партиясына лайықты бәсекелес болды. Олардың әрқайсысы 33 дауыстан жинады. Бұл жолғы әкімдердің сайлауы демократияландыру,мен орталықсыздандыру жолындағы сәтті қадам екенін айтты сарапшы.Ж.МҮСІЛІМ