Қазақ және жапон әртістері Токиода өтіп жатқан Олимпиадаға орай достық, келісім және өзара қолдауға арналған бейнеролик жариялады.
Бейнероликте Жамбыл атындағы Қазақ мемлекеттік филармониясының жеке орындаушылары Ержан Әлімбетов (домбыра), Федор Артамонов (виолончель), Б.Байқадамов атындағы Мемлекеттік хор капелласының әртісі Индира Құдабаева (вокал), STEPPE SONS альтернатив-фольк тобының белді мүшесі Мұратбек Раманқұлов және жапон музыканттары Юмико Фурухаши (моринхуур), Такеши Такеучи (электр бас), Тузан Хирано (сякухачи), Аи Ямагучи (вокал) бірігіп Рокусукэ Эйдің сөзіне, композитор Хатидай Накамураның музыкасына жазылған жапондық әнші Кю Сакамотоның әйгілі Ue o Muite Arukō (Sukiyaki) әнін орындап шықты. Бұл ән Жапонияда 1961 жылы дүниеге келген, бірнеше мемлекеттердің топ-чарттарында, соның ішінде америкалық Billboard hot 100 чартында бірінші орынды иемденген. Сонымен қатар музыканттар қазақтың «Көзіңнің мөлдірін-ай» атты халық әнін нақышына келтіріп орындады. Жоба музыканттардың композицияға қазақ және жапон халықтарының көне музыкалық аспаптарын пайдалануымен және әннің түпнұсқа тілінде орындалуымен ерекшеленген. Бейнероликте екі мемлекеттің айрықша табиғаты мен көне салт-дәстүрлері көрсетілді. Композицияның негізгі идеясы – халықтар арасындағы өзара байланысты орнату және қолдау көрсету.Н.СӘРСЕНҒАЛИҰЛЫ