Чемпиондар лигасының екінші іріктеу сатысында алматылық «Қайрат» сырт алаңда Сербияның «Црвена Звезда» клубымен қарымта ойында жеңіліп қалды. Алғашқы кездесуде алматылық клуб "Црвена Звездадан" 2:1 есебімен басым түскен еді. Бүгінгі кездесуде сербиялық футболшылар сәтті ойын көрсетті. Бірінші таймда сербиялық клубтың ойыншысы Александар Катаи 9, 42, Луа Дьони 21-минуттарда мергендік танытты. Екінші таймда сербиялық команда басымдығын арттыра түсті. Алдымен Мирко Иванич 49-минутта есепті үстемелей түссе, Филиппо Фалько 56-минутта қақпаны дәл көздеді. Осылайша «Қайрат» қарсыласынан 0:5 есебімен жеңілді. Енді «Қайрат» 5 тамызда Еуропа лигасы үшінші іріктеу сатысында Арменияның «Алашкерт» клубымен сынға түседі.