Елорданың іргесіндегі Ақмола облысының бірқатар ауылдары ауызсудың зардабын жылдар бойы тартып келеді. Кенезесі кеуіп, таза суды қаладан тасып ішетін жұрт мәселенің ондаған жылдан бері шешілмей келе жатқанын айтады. Шалғайда жатқан ауылдарды айтпағанда, білдей аудан орталықтарында жағдай алаңдатарлық. Солардың бірі – Шортанды кенті.
Елордадан 60 шақырым ғана қашықта болса да, ауызсу жайы ондаған жыл бойы шешімін таппаған. Осыдан 3-4 жыл бұрын жаңадан су құбыры тартылғанда шортандылықтар бөріктерін аспанға ата қуанысқан. Тіпті, тұрғындар арасында су құбырын ауласының алдына жеткізгені үшін мердігерге 40 мың теңгеден ақша да төлеген. Бірақ қуаныштары ұзаққа созылмаған. Шамамен 6 мыңға жуық тұрғыны бар кентте тіршілік нәрі сол күйі жөнді тамар емес... Тұрғындар, әсіресе жаздың аптап ыстығында сусыз қалғандарына наразы. Күнделікті үй тұрмысына пайдалануға да судың жетіспейтінін айтқан тұрғындар базынасын жергілікті биліктің құлағына жеткізе алар емес.«Онсыз да сыздықтап ағатын су арада аз уақыт өтпестен тоқтап қалады. Адам сияқты кір-қоңымызды, киімдерімізді жуудың өзі әзірге арман болып тұр. Таңғы жеті шамасында 1-2 сағат су беріп, одан кейін сөндіріп тастайды. Ал күндізгі 2-ден кешкі жетіге дейін су мүлде тамбайды. Кешкі жетіден түнгі он екілерге дейін болса болды, ал түнгі уақытта тағы ағытылады. Осылай сусыз қиналғанымызға ондаған жыл болды. Әрине, біз шеткі жақта тұрғандықтан бізге су жетеді. Ал кенттің ішкі жақтарындағы үйлерде, әсіресе 2-3 қабатта тұратындарға мүлде су жетпейді. Мал суару, бау-бақшаға суару сияқты жұмыстарға су таппай қиналамыз. Ал жергілікті билік қыс болса құбыр жарылғанын, жаз болса бау-бақша суаратындықтан судың жетіспейтінін айтып ақталады», – дейді Светлана есімді Шортанды кентінің тұрғыны.Судың зардабын тартқан халық су берілген уақыттың өзінде сыздықтап ағатынын айтады. Сусыз қалған жұрт краннан тамшылап аққан сумен құман толтыру үшін күні бойы сарыла күтуге мәжбүр.
«Су сыздықтап ақса, қуанатын жағдайға жеттік. Суды не ыдысқа құйып алатыныңды, не кір жуарыңды не жуынарыңды білмейсің. Тәуліктің 13 сағаты сусыз отырамыз. Ал кестеге сәйкес 11 сағат су берілуі тиіс. Бірақ осы 11 сағатта су бізге жетіп үлгергенше ағытылып та қалады. Мәселен, бүгін күндізгі сағат екіге дейін су берді. Су берді деген аты болмаса, краннан су тек тамшылап тұрды. Күндіз екі сағат берсе де, тым болмаса судың қысымын көбейтсе жөн болар еді. Міне, үш күннен бері тіпті жуына да алмай жүрмін», – дейді Гүлмира Күпішева есімді Шортанды тұрғыны.Ал жергілікті билік судың тапшылығын ауа райының жылдағыдан ыстық болуымен әрі тұрғындардың суды бау-бақшаға көбірек пайдаланып жатқанымен түсіндірмек болды.
«Жазғы маусым басталысымен Шортанды кентінде тұрмыстық қажеттіліктерге де, жекеменшік үйлердің маңындағы бау-бақшаны суару үшін де тұтыну күрт өсті. Салдарынан судың қысымы азайып, көптеген тұрғын су тапшылығына тап болды. «Шортанды Су» коммуналдық кәсіпорнының қызметкерлері жедел арада бұл мәселені шешу үшін барлық мүмкіндікті қарастырып жатыр. Су көлемін арттыру үшін қосымша тағы бір су ұңғымасы іске қосылған. Қазір Шортанды кентінің суасты ұңғымаларында сапалы ауызсу қорының дебеті аса өткір тұр. Мәселені түбегейлі шешу үшін Шортанды кентінде су құбыры желілерін қайта құру жобасы бойынша жобалық-сметалық құжаттама жасалып жатыр. Су тарту Егемен ауылы арқылы жүзеге асырылмақ. Жобаны жүзеге асыру кентті сапалы ауызсумен қамтуға мүмкіндік береді», – дейді Шортанды аудандық тұрмыстық-коммуналдық шаруашылық бөлімінен.Ауданның тұрмыстық-коммуналдық шаруашылық бөлімі ауыл тұрғындарынан су құбырын тартқаны үшін ақша жиналғанын жоққа шығарды.
«Осыған дейін 2017 жылы республикалық бюджет қаржысына Шортанды кентінде су тарту желілері мен құбырларын қайта жаңарту жүргізілген. Ал тұрғындардан ақша жиналған жоқ. Су құбыры тұтынушылардың шекарасына дейін жеткізіліп берген», – деп толықтырды аудандық тұрғын үй-коммуналдық шаруашылық бөлімінен.Сонымен әзірге ауылдар түгілі Шортанды ауданының орталығындағы ауызсу мәселесінің шешілер түрі көрінбейді. Тұрғындар мәселенің ондаған жылдан бері шешімін таппағанын айтып зар илейді. Ал билік салынған құбырлардан қашан тәулік бойы су тынымсыз ағатынын айта алмай отыр...
Абзал АЛПЫСБАЙҰЛЫ, Ақмола облысы