«Еңбек ресурстарын дамыту орталығы» АҚ дерегінше, электронды биржада шілдеде жұмыс орындарының саны резюмелерден 1,7 есе асып түсті. Нақтылай кетсек, биржада 81,7 мың бос жұмыс орны және 47,9 мың түйіндеме орналастырылған.
Маусым айымен салыстырғанда бос жұмыс орындарының (БЖО) жалпы саны 15%-ға, ал резюмелер саны 3%-ға азайды. Ал Түркістан, Ақмола, Атырау облыстары мен Шымкентте кадр жетіспеушілігінің күшейгені байқалады. БЖО санының ең елеулі өсімі сауалнама жүргізуші-сұхбаттасушы (+2,2 мың), хат алмасу жөніндегі көмекші (+0,9 мың) және статист (+0,6 мың) сияқты кәсіптер бойынша байқалды. Біліктілігі жоқ еңбекке байланысты кәсіптер арасында тауарларды жинақтаушы, базардағы сатушы және буып-түюші кәсіптері көбірек ұсынылды. Сонымен қатар, шілде айында жұмыс іздегендер арасында кіші медициналық қызметкерлер мен мектеп мұғалімдерінің белсенділігі артқан. Атап айтқанда, бір ай ішінде фельдшерлер резюмесінің саны 421 бірлікке, медбикелердікі – 237 бірлікке, бастауыш сынып, шет тілі, дене шынықтыру және спорт мұғалімдерінікі тиісінше 283, 271 және 266-ға өсті. Педагогика қызметкерлері арасындағы белсенділікті жаңа оқу жылының жақындауымен байланыстыруға болады. Ал медицина қызметкерлері коронавируспен күрестен шаршаса керек. Шілдеде күзетшілердің, автокөлік жүргізушілерінің, санитарлардың, сауалнама жүргізуші-сұхбаттасушылардың (2595 бос орынға 48 резюме), хат алмасу бойынша көмекшілердің (1 резюме және 923 бос орын) және статистердің (10 резюме және 665 бос орын) тапшылығы тіркелді. Бұған елде жалпыхалықтық санақтың жүруі ықпал еткен. Бұдан бөлек, жүк түсірушілер, қара жұмысшылар, ас үй жұмысшылары мен аула сыпырушылар жетіспейді. Ал фельдшер (607 резюмеге 201 бос жұмыс орны), дене шынықтыру және спорт (92 бос жұмыс орны және 459 резюме), шет (229 бос жұмыс орны және 576 резюме) және қазақ тілі мұғалімдері (116 бос орын және 455 резюме) бойынша ұсыныс сұраныстан асып түсті.А.ШӘРІП