Ғалымдар коронавирустың қашан жай тұмауға айналатынын анықтады
Ғалымдар коронавирустың қашан жай тұмауға айналатынын анықтады
©azattyq-ruhy

Алдағы он жылдың ішінде SARS-CoV-2 кішкентай балаларға жиі жұға бастап, жай тұмауды қоздыратын коронавирустарға ұқсап кетуі мүмкін. Пенсильвания университетінің ғалымдары осындай болжам жасап отыр. Зерттеу нәтижесі Science Advances журналында жарияланды.

Ғалымдар математикалық модельдеу негізінде адамның жас ерекшеліктерін ескере отырып, пандемияның қалай өзгеретінін, сондай-ақ коронавирусты жұқтыру және одан қайтыс болу сценарийлерін зерделеп шықты. Зерттеуге сәйкес, алдағы уақытта ересек адамдардың коронавирусты жұқтыру көрсеткіші төмендейді. Себебі оларда иммунитет болады. Университет мамандары қысқамерзімді, ортамерзімді және ұзақмезімді, яғни 1, 10 және 20 жылда болатын аурудың динамикасына болжам жасады. Осы орайда, ғалымдар Қытай, Жапония, Еуропа, Испания, Италия, АҚШ, Бразилия және тағы басқа елдердің демографиялық ерекшеліктерін де ескерді.

Оған қоса, болашақта инфекция жұқтыру қаупі балалар арасында жоғары болады. Тұмауды қоздыратын вирустар мен коронавирустар да дәл сондай өзгеріске ұшыраған. Мәселен 1889-1890 жылдары "азиялық тұмау" немесе "орыс тұмауы" болған. Соның салдарынан миллион адам қайтыс болды. Олардың басым бөлігі – 70 жастан асқандар. Осы пандемия HCoV-OC43 вирусынан басталды деген болжам бар. Артынан ол жай тұмау вирусынан айналып, көбінесе 7-12 айлық балаларға жұққан.

Дегенмен, ересектерде SARS-CoV-2 вирусына қарсы қажетті иммунитет болмаса, қазіргі коронавирус қайта-қайта жұға береді. Сөйтіп, айналып жүреді. Бірақ адамдар жеңіл ауырады.