Павлодарлық студенттер таспалайтын сериал университет қабырғасындағы өмірге арналған алғашқы сериал болмақ. Бұл жайында «Хабар 24» кеңінен ақпарат таратты.
Жобаның ерекшелігі сол, шығармашылық жұмыспен тек студенттер айналысады. Сценарий авторлары, әртістер, режиссерлер мен операторлардың бәрі – жастар. Қыз-жігіттер шығармашылық процеске кіріспек бұрын кастинг жариялап, 50-ден астам студенттің өтінішін қарастырған. Нәтижесінде, 15 кандидат таңдалды. «Сериал түсіру идеясы өткен жылдың күзінде пайда болды. Бұған дейін Павлодарда «Аудандағы махаббат», «Бауырлар» сияқты бірнеше шағын инста-сериал түсірілді. Содан болар шабыттанып кеттім. Неге бізге де түсірмеске деп ойладым. Бастама көтеріп, қатарластарымның қолдауына ие болдым», – дейді инста-сериал режиссері Дәурен Шәріпов. Қазір студенттер сериалдың сценарийін оқып жатыр. Ескерерлігі, сценарийді студенттер өздері жарты жыл бойы жазған. Ал кейіпкерлерді іріктеумен Жүсіпбек Аймауытов атындағы қазақ музыкалы драма театрының кәсіби мамандары айналысқан. Басты рөлдерді жергілікті университеттің студенттері сомдайды. Басты рөл болашақ заңгер Әлішер Төлеубаевқа бұйырған. Өзі «Жайдарман» ойыншысы болғандықтан, ондаған студенттің ішінен үздік атанған екен. «Мамырда кастинг болды. Сол кастингтен өттім. 30-дай студент болды. Басты рөлді берді. Өзім КВН ойнап жүрдім. Сол КВН арқылы кішкене тәжірибем бар. Жатақханадағы тірлік, дәрісханадағы сабақтар мен алғашқы махаббат. Жаңа туынды студенттік өмірдің қызығы мен шыжығын көрсетуді мақсат етеді. Идеяны жүзеге асыруға бір тиын да жұмсалмаған. Әртістер жүктелген міндетті тегін орындауға келіскен. Түсірілімнің барлық жұмысын жалынды жастар өздері атқарып шығады», – дейді студент Әлішер Төлеубаев. Ал студенттік қозғалыстың белсендісі Ажар Аманжолованың айтуынша, сериалды түсіруде кәсіби бейнекамералар қолданылмайды. Олар қарапайым ұялы телефонға түсіреді. Кейінгі кезде инста-сериалдарды түсіру қарқын алған. Павлодарлық студенттер де заман көшінен қалыспай, шағын туынды жасағысы келген. Бейнематериалдың сапасы жаман емес. Әлеуметтік желілерге арналған туынды тоғыз серияға шақталған. Сериалдың премьерасы тамыз айының соңында өтпек.Айбике ЖАНАСЫЛ