Қарағандыда тамыз конференциясы өтті. Балабақшалар мен бөбекжайларды, үйірмелер мен секцияларды қолжетімді ету, инклюзивті оқытуды дамыту – Қарағанды облысының әкімі Жеңіс Қасымбек онлайн режимде өткен тамыз кеңесінде алдағы оқу жылына міндеттер қойды.
Өңір басшысы тоғыз негізгі бағытты атады
1-ден 6 жасқа дейінгі балаларды мектепке дейінгі тәрбиемен қамтуды 84-тен 86,5%-ға дейін ұлғайту қажет. Жеке инвестицияларды көбірек тарту осы көрсеткішке қол жеткізуге көмектеседі. Білім беру қызметтерінің сапасын арттыру үшін облыс әкімі жыл соңына дейін мектептер мен колледждердің қоғамдық рейтингін енгізуді тапсырды. «Оқу мектебі» республикалық жобасы аясында 2022 жылдың соңына дейін барлық мектеп пен колледждің кітапхана қорларын жаңарту талап етіледі. Оқушыларды қосымша біліммен қамту 66,7-ден 86%-ға дейін ұлғайтылуы тиіс. Барлық колледжде WorldSkills стандарттары бойынша демонстрациялық емтихандарды енгізу қажет. Дуальды оқытуда студенттерді қамтуды кем дегенде 20%-ға көтеру жоспары қойылған. Жеңіс Қасымбек инклюзивті білім беруді, патронаттық тәрбиені, балалар мен жасөспірімдерге психологиялық көмек көрсетуді дамыту бойынша міндеттер қойды. Облыста педагогтердің кәсіби деңгейін арттыру бойынша жұмыстар жалғасады. Кадр тапшылығы мәселесін шешу үшін қалалар мен аудандарда мұғалімдерге қызметтік тұрғын үй беріледі. – Біз өткен оқу жылының қорытындысын шығарып, болашаққа қойылған міндеттерді анықтадық. Оларды табысты іске асыру педагогикалық ұжымдар мен барлық мүдделі құрылымның күш-жігерін біріктірген кезде ғана мүмкін болады, – деп атап өтті Жеңіс Қасымбек.Жаңа мамандық ашылады
Қарағанды облысының колледждерінде он жаңа мамандық ашылады. Бұл өңірдегі сұранысқа ие мамандардың тапшылығын жабуға мүмкіндік береді. Интеграцияланған модульдік білім беру бағдарламаларын енгізудің арқасында студенттер бірден-бір мамандықтың орнына бірнеше біліктілік алады. Колледждерде еңбек нарығын талдауға негізделген SKILLS-ID бағдарламасы енгізіліп жатыр. Талап етілмеген мамандықтар саны қысқарады. Оның орнына жаңа, әлеуеттілері ашылады. Бұл туралы онлайн режимде өткен педагогтердің тамыз кеңесінде Қарағанды облысы Білім басқармасының басшысы Гүлсім Қожахметова айтып берді. – Соңғы үш жылда сұранысқа ие он мамандық ашылды, оның ішінде екі мамандық бойынша дайындық тек біздің облыста жүргізіледі – «Микроэлектроника және мобильді құрылғылар» және «Ақпараттық қауіпсіздік». Жаңа оқу жылында тағы да он мамандық ашамыз, – деді Гүлсім Қожахметова. – Бұл «Автожолдар мен әуеайлақтарды салу және пайдалану», «Цифрлы техника (түрлері бойынша)», «Ғимараттарды жобалау мен пайдаланудың автоматтандырылған жүйелері», «Киім дизайны», «Өнеркәсіптік өнім дизайны», «Интерьер дизайны», «Ақпараттық қауіпсіздік жүйелері», «Жаңартылатын энергетика», «Шиналар өндірісі», «Логистика».«Жас маман» жобасы іске асады
15 колледжде жоғары білікті мамандарды даярлауға және жаңа сұранысқа ие мамандықтарды ашуға бағытталған «Жас маман» республикалық жобасы іске асырылып жатыр. Жоба аясында колледждер заманауи жабдықтармен жабдықталған. Сондай-ақ өңірде жеті құзыреттілік орталығы құрылды. Болашақта олардың бірінің базасында жаттығу лагері болады. Облыста барлығы 15 құзыреттілік орталығы бар. Келесі жылы осындай сегіз алаң ашу жоспарланған. – Дуальды оқытуды дамыту бойынша жұмыстар жалғасады. 360 кәсіпорынмен ынтымақтастық орнатылған. Биыл дуальды оқытумен қамтылған мамандықтардың үлесі 50%-ды құрайды, – деп атап өтті спикер. – Жұмысшы мамандықтарды дәріптеуге бағытталған Worldskills халықаралық қозғалысын дамыту бойынша жұмыс жалғасады. Биыл түлектердің қорытынды аттестаттауы алғаш рет WorldSkills стандарттарын ескере отырып, кадрларды даярлау сапасын бағалаудың жаңа құралы – демонстрациялық емтиханды қолдану арқылы өткізілді. Бұл форматтағы емтихандардан 13 колледж базасында 630 студент өтті. SkillsPassport алған түлектер жас мамандардың мәліметтер базасына енгізілді, оған қызметкерлерді іздеу және іріктеу үшін жетекші кәсіпорындардың жұмыс берушілері қол жеткізе алады. Өңір колледждері халықаралық компаниялармен де ынтымақтастық орнатты. Ресейлік «Татнефть» компаниясымен бірлесіп Саран көпсалалы колледжінің базасында «Шиналар өндірісі» жаңа мамандығы «Покрышкаларды құрастырушы-қалыптаушы», «Автокамералық агрегат машинисі», «Престеуші-вулканизаторшы», «Техник-технолог» біліктілігі бойынша құрылады.Әлеуметтік жауапкершілік: Қарағанды облысында өнеркәсіпшілер педагогтерге қолдау көрсетті
Қарағанды облысында «Қазақмыс» корпорациясы педагогтердің біліктілігін арттыру курстарын қаржыландырды. Компанияның көмегімен педагогикалық трансформация орталығы құрылады. «Қазақмыс» корпорациясының даму жөніндегі директоры Бақтияр Қырықпышев педагогтердің тамыз айындағы онлайн конференциясына қатысты. Ол білім беру саласына әлеуметтік қолдау көрсетілетіні туралы айтты. Өткен оқу жылында компанияның бастамасымен Жезқазған өңірі және Балқаш мектептерінің 1 332 мұғалімі «НЗМ» АҚ Педагогикалық шеберлік орталығында біліктілігін арттырды. Тағы 4 мыңға жуық педагог семинарларда, вебинарларда және каникулдық мектепте оқыды. Сонымен қатар Нұр-Сұлтанға білім туры ұйымдастырылды. – Біз «Ұстаз – Ұлытау» педагогикалық трансформация орталығы» жобасын бастаймыз. Оны жүзеге асыруға халықаралық сарапшылар тартылды. Жобаның мақсаты – «Қазақмыс» қатысатын өңірлердегі мектептерде оқушының мүддесі мен оның кәсіби келешегі үшін оқыту сапасын арттыру. Сондай-ақ Сәтбаевта балаларға қосымша білім беру және ерте кәсіби бағдар беру үшін оқыту және жұмысқа орналастыру орталығын ашуды жоспарлап отырмыз, – деп Бахтияр Қырықпышев жаңа бастамаларын ұсынды.Инклюзивті білім беру
Өткен оқу жылында Қарағанды облысында ерекше балаларға қажетті жағдай жасаған мектептер саны 343-тен 370-ке дейін өсті. Инклюзивті білім берумен қамту 73%-ды құрайды. Бұл туралы Қарағанды облысының Білім басқармасының басшысы Гүлсім Қожахметова айтып берді. – Психологиялық-педагогикалық сүйемелдеу қызметіне педагог-ассистенттердің 59 штаттық бірлігі енгізілді. Аутистік спектрдің және ментальды, мінез-құлықтық ауытқулары бар балалардың саны өсіп келе жатқанын ескере отырып, соңғы екі жылда облыстың сегіз мектебінде инклюзияны қолдау кабинеттері ашылды, оның төртеуі «Болашақ» қайырымдылық қорымен бірлесіп іске қосылды, – деді Гүлсім Қожахметова. – Инклюзивті тәжірибе бойынша оқытудан өткен педагогтердің үлесі 32-ден 60%-ға өсті. Биыл мемлекеттік әлеуметтік тапсырыс аясында 207 педагог қолданбалы мінез-құлық талдауы бойынша оқудан өтеді. Бұл қосымша 500-ден астам баланы білім беру қызметтерімен қамтуға мүмкіндік береді. Сондай-ақ қыркүйек айынан бастап Теміртауда 60 орындық оңалту орталығы өз жұмысын бастайды. Жыл соңына дейін облыс орталығында тағы бір психологиялық-медициналық-педагогикалық кеңес және Қарағанды мен Сәтбаев қалаларында екі түзету кабинетін ашу жоспарланған. – Алдағы жылы Шахтинск қаласында ПМПК және Қарағандыда «Асыл мирас» қайырымдылық қорымен аутизмі бар балаларға арналған оңалту орталығын ашуды жоспарлап отырмыз. Осы жылы жұмыс істеп тұрған арнайы ұйымдар мамандарының штаты 50 адамға ұлғайтылды. Бұл мыңнан астам баланы оңалту көмегімен қосымша қамтуға мүмкіндік береді, – деді Гүлсім Қожахметова. Сонымен қатар өңірде «Малахит» интерактивті платформасы енгізіліп жатыр, ол арнайы білім беру ұйымдарына құжаттарды қабылдау, балалардың тексеруден өтуі және кейіннен оңалтумен консультативтік көмек алу рәсімдерін жеңілдетуге мүмкіндік береді.Ә.БЕЛГІБАЙҰЛЫ, Қарағанды облысы