Парламент Мәжілісінің депутаты Марат Құсайынов Зеренді ауданындағы Milk project сүт зауытының жұмысымен танысты. Халық қалаулысы сүт өңдеу кәсіпорнындағы өнім көлемін ұлғайту үшін заманға сай технологияларды енгізу қажет екенін айтты.
Milk project сүт зауыты – мемлекеттік қолдаудың арқасында қайта жаңғыртудан өтіп, еңбек өнімділігін бірнеше есеге арттырған кәсіпорындардың бірі. Ол үшін серіктестік өндіріске цифрлы технологияларды енгізіп, жұмысқа білікті мамандарды тартыпты. Сүт өңдеу кешені бүгінде Ресей, Израиль, Швеция елдерінің заманауи қондырғыларымен жабдықталған. Соның арқасында соңғы 10 жыл ішінде кәсіпорын сүт өнімдерін қайта өңдеу көлемін бірнеше есеге арттырған. Бүгінде кәсіпорын жылына 20 мың тонна сүт өнімін шығарады. Бұл көрсеткішке сүт –тауарлы ферма ашу арқылы қол жеткізген. Себебі шикізаттың негізгі көлемі өздерінікі болғандықтан, өндірісті жыл он екі ай тоқтатпай, бір қарқынмен жұмыс істеу мүмкіндігіне ие болды. Кездесу барысында Парламент Мәжілісінің депутаты Марат Құсайынов ауыл шаруашылығы саласында заманауи агротехнологияларды енгізбей, өнім көлемін ұлғайту мүмкін емесін атап өтті. «Қазір ауыл шаруашылығы өнімдерімен елімізді, сондай-ақ шетелде өз өнімдерімізді кеңінен бағыттау үшін агротехнологияларға баса мән беру қажет. Бұл өз кезегінде экспорттық әлеуетті арттыруға мүмкіндік береді», – деді депутат.
Айта кетейік, кәсіпорын өз өнімдерін Қазақстан бойынша ғана емес, Ресейдің бірнеше қаласына да жөнелтеді.
Кәсіпорын «Бизнестің Жол картасы-2020» бағдарламасы арқылы 300 млн теңге көлемінде қаржылай қолдау тапқан. Сонымен қатар «Қарапайым заттар экономикасы» бағдарламасының субсидиялау бағыты бойынша сүт-тауарлы фермасын ашуға қолдау көрсетіліпті. Биыл фермаға сүтті сиырлардың алғашқы партиясы жеткізілді.
Халық қалаулысы елімізде агроөнеркәсіптің дамуына мемлекет тарапынан қолдау әлі де көрсетілетінін атады. Тек қайтарымы болу керек.
Кәсіпорын басшылығы тұрақты жұмыс орындарын ашу және салық төлеуде де кәсіпорын өз жауапкершілігін ұмытпағанын атап өтті. Бұл бағытта Milk project сүт зауыты өңірдің алдыңғы өндіріс орындарының қатарында. Кәсіпорында бүгінде 99 адам жұмыс істейді. Ал өткен жылы бюджетке 200 млн теңге көлемінде салық төлеген.
Абзал АЛПЫСБАЙҰЛЫ, Ақмола облысы