Мемлекет басшысы Қасым-Жомарт Тоқаев Еуропалық кеңес Президенті Шарль Мишель-мен және Сауд Арабиясы Корольдігінің тақ мұрагері ханзада Мұхаммед бен Салман Әл Сауд-пен телефон арқылы сөйлесті.
Еуропалық тараптың бастамасымен Қасым-Жомарт Тоқаев Еуропалық кеңес Президенті Шарль Мишельмен телефон арқылы сөйлесті.
Президенттер Ауғанстандағы қазіргі жағдай бойынша жан-жақты пікір алмасты. Қасым-Жомарт Тоқаев Шарль Мишельдің сұрауы бойынша, Қазақстанның ауған мәселесіне қатысты ұстанымын білдірді. Мемлекет басшысы әлемдік ұйымға қолдау көрсету мақсатымен БҰҰ-ның Ауғанстандағы кеңсесін Алматыда уақытша орналастыру туралы шешім қабылданғанын хабарлады.
Қасым-Жомарт Тоқаев Қазақстандағы ауған студенттеріне де тиісті көмек көрсетіліп жатқанын айтты. Мемлекет басшысы ауған мәселесіне қатысты, соның ішінде Ауғанстанда да Қазақстан мен Еуропалық кеңес тығыз қарым-қатынас орната алады деп есептейді. Қазақстан Еуропалық Одақ елдерінің азаматтарын эвакуациялаған ұшақтарға өз әуежайларында жанар-жағармай құюға мүмкіндік жасағаны туралы айтылды.
Мемлекет басшысы Ауғанстанда барлық этностық топтардың қатысуымен инклюзивті үкімет құрылғаннан кейін жағдайдың тұрақталатынына үміттенеді. Бұған соғыстан зардап шегіп отырған барлық ауған халқы мүдделі.
Ал Сауд Арабиясы Корольдігінің тақ мұрагері ханзада Мұхаммед бен Салман Әл Саудпен телефон арқылы сөйлесу барысында тараптар мұсылман жыл санауы бойынша жаңа Хижра жылының басталуына орай бір-бірін құттықтап, екі ел арасындағы ынтымақтастықтың қазіргі жағдайы мен оны нығайту перспективаларын талқылады.
Қазақстан Президенті бүгінгі екіжақты қатынастар деңгейін оң бағалап, қосымша серпін беру мүмкіндіктерін қарастыру қажеттігін айтты. Осы орайда, Қасым-Жомарт Тоқаев пен Сауд Арабиясының тақ мұрагері мемлекеттер арасындағы ықпалдастықты жаңа жобалармен толықтырып, оларды бірлесе жүзеге асыруға бағытталған «Қазақстан – Сауд Арабиясы» Үйлестіру кеңесін құру туралы бастаманы толықтай қолдады.
Ханзада Мұхаммед бен Салманның айтуынша, Эр-Рияд қазақ нарығындағы инвестициялық әлеуетін арттыруға мол мүмкіндік бар екеніне көз жеткізіп отыр.
Мемлекет басшысы бұл пікірмен келісе отырып, Сауд Арабиясы Корольдігінің тақ мұрагерін екіжақты ықпалдастықтың барлық бағыттарын талқылау мақсатында Қазақстанға сапармен келуге шақырды.
Сондай-ақ тараптар Ауғанстандағы жағдайды және оның өңірлік қауіпсіздік үшін ықтимал салдары мен қауіп-қатерлерін жан-жақты талқылады. Аталған елдегі ахуалға қатысты алаңдаушылық білдіріп, Ауған елінің тұрақсыздық бастауына айналмай, бейбіт жолмен шешілетініне үміт артты.
