«Nur Otan» партиясы Батыс Қазақстан облыстық филиалы төрағасының бірінші орынбасары Мұрат Мұқаев түрлі мәселелер бойынша тұрғындарды қабылдады.
Қабылдауға бірнеше жыл бойы көрші үйлердің кәріз жүйесінің дұрыс орналастырылмау салдарынан жапа шегіп жүрген облыс тұрғыны келді. Тұрғынның айтуынша, облыстың жергілікті атқарушы органдарына бірнеше рет барып, көмек сұраған. Бірақ әлі күнге дейін көңіл көншітерлік ешқандай шара қолданбағаны белгілі болды. Бұл жолы партия тарапынан көмек болар деп, өтінішпен келген. Мұрат Рахметұлы тұрғынның барлық байланыс деректерін жазып алып, жауапты мемлекеттік органдарға сауал жолдап, аталған мәселені өз бақылауына алатынын жеткізді. Сондай-ақ қабылдауға отбасылық жағдайға байланысты тұрғын үй мәселесімен егде жастағы кейуана да келді. Тұрғынның айтуы бойынша, шамамен бір жыл бойы жақын туыстарында тұрақтаған. Жәнібек ауданының тұрғыны болғандықтан Мұрат Мұқаев сол ауданның әкімдігіне хабарласып, барлық деректерді анықтады. Жалпы, тұрғын үй мәселесімен бас сұққандардың қатары көп болды. Мәселен, тұрғын үй мәселесімен тағы бір жалғызбасты ана, зейнеткер келген. Бірнеше жыл бұрын баласы өмірден озған, жолдасы да ертеректе көз жұмыпты. Алып отырған зейнетақысы пәтер жалдаудан аспайды. Үй иелері күзде жалдап отырған пәтерін босатуын талап еткен. Тұрғынның мәселесін толығымен тыңдап, барлық мән-жайды білгеннен кейін партияның облыстық филиалы төрағасының бірінші орынбасары қала әкімдігі мен ТҮКШ бөліміне сауал жолдады. Қабылдауға келесі болып баспанасыз қаламын деп қауіптенген екі баланың қамқоршысы келген. Жетім қалған балаларға мемлекет тарапынан үй беру мүмкіндігі бар екені белгілі болғанымен, қағаз жүзінде барлығы да жақсы бола тұра, үйіне кіре алмай жүргені белгілі болды. Нақтырақ айтсақ, Хан тоғайы жақта жолдасынан қалған үйі 1995 жылы салынған екен. Аталған үйде 2013-2014 жылдарға дейін тұрған. Балаларының университетке оқуға түсуіне байланысты қалаға уақытша қоныс аударған. Ал биыл Хан тоғайына барған кезде үйін бұзып тастағанын көрген. Ендігі кезекте үйдің құжаттары қолында бола тұра, не аталған жер учаскісіне үй сала алмай, не категория бойынша үй кезегіне тұра алмай жүргеніне 8 жыл толып отыр. Мұрат Рахметұлы барлық жауапты органдардың өкілдерінің қатысуымен партия алаңында кеңейтілген отырыс өткізуді ұсынып, тұрғынға заңнамалық тұрғыдан кеңестер берді. Бұдан бөлек, тағы бір тұрғын толық емес категориясы бойынша әкімдік тарапынан алған уақытша жалдамалы үйдің жағдайына көңілі толмайтынын жеткізді. Мысалы, тұрғын үйге газ құбырлары толық орнатылмаған. Көмек сұраған азаматтың барлық байланыс деректері жазылып, консультативтік және заңнамалық тұрғыдан кеңес берілді. Егер осындай заңсыздыққа тап болып, көмекке зәру болған жағдайда партия өкілдері қабылдау жүргізіп, қол ұшын созуға дайын екендерін айтты.М.ХАҚНАЗАР