Елде тұңғыш рет халықтың дауыс беруімен ұйымдастырылған сайлауда жеңіске жеткен ауыл әкімдерінің қызметіне кіріскендеріне бір ай толды. Ақмола облысында додаға түскен 95 үміткер ауыл әкімі болып сайланған. Солардың бірі – бұрын әкім болып қызмет етпесе де, бірнеше лауазымды орында өзін лайықты түрде көрсетіп үлгерген Фархат Байқасов. Ол «Nur Otan» партиясы атынан үміткер болды. Жас әкім Ақмола облысындағы шалғай өңірлердің бірі Жарқайың ауданының орталығы Державин қаласына әкім болып сайланған. Елдегі ең өзекті мәселелерді електен өткізіп алған әкім алғашқы кезекте халықтың әлеуметтік мәселелерін шешуге бел буыпты.
6 мыңнан астам адам тұратын Державин қаласы кезінде Кеңес Одағының зымырандар дивизиясы орналасқан әскери қалашық болатын. Тіпті, қауіпсіздік үшін картада көрсетілмеген де еді. Кейінірек әскери дивизия таратылып, кент жергілікті билікке табысталған. Тоқырау кезінде тоз-тозы шығып, қалада бос қалған 5 қабатты әскерилер тұрған үйлер бұзыла бастаған. Дегенмен соңғы жылдары қаңырап қалған көпқабатты үйлер қайта қалпына келтіріліп, мұқтаж адамдарға беріле бастаған. Алайда шешілмеген түйінді мәселелер әлі де баршылық екенін жаңа сайланған әкім бүкпесіз жеткізді.Қаңырап қалған үйлерді қалпына келтірмекпіз...
Жұмыс жоспарының алғашқы қадамын да әкім қаладағы толғағы жеткен жоғарыдағы түйінді мәселелерді шешуге ұмтылудан бастағанын айтады. Қалада жеті бірдей жылу қазандығы жұмыс істегенімен, үйлердің көбі орталықтандырылған жылуға қосылмаған. Жаңадан сайланған әкім осы және өзге де өзекті жайларды жоспарына енгізіп, іске кірісіп кеткенін жеткізді. «Державин қаласында да халықтың ең өзекті проблемасының бірі – баспана. Бүгінге дейін 450 адам пәтердің кезегінде тұр. Сондықтан әкім болып іске кіріскен алғашқы сәттен бастап әлеуметтік баспаналарды қайта қалпына келтіру жайына назар аудардым. Сөйтіп, 80 пәтерлі екі үйді қалпына келтіру жұмысына әзірлік басталып кетті. Қазір бір үйді қалпына келтірудің жобалық-сметалық құжаттамалары әзірленіп, мердігер ұйымды анықтау үшін конкурс жарияланды. Үйлер көпбалалы отбасыларға, жетім-жесірлерге, бюджеттік қызметкерлерге берілмек. 80 пәтерлі екінші үй жобасы келесі жылға жоспарланып отыр. Сондай-ақ күзге қарай қалада жүзу бассейнін салуды көздеп отырмыз. Бұдан бөлек, қаладағы көп үйлер орталықтандырылған жылу жүйелеріне қосылмаған. Негізі, мектеп, балабақша, аурухана сияқты әлеуметтік нысандардың жанындағы бірен-саран үйлер ғана жылу желісіне қосылған. Мемлекеттік сараптамаға өтінім бердім. Алда тағы 25 үйді орталықтандырылған жылу желісіне қосу ойымда бар», – дейді Фархат Байқасов. Ауыл әкімінің айтуынша, мыңнан астам отбасы түтін түтететін аудан орталығында жолдардың 80 пайызына жуығына асфальт төселген. Бірақ қала көшелерін жарықтандыру жағы кейінге қалып қойған. «Бағдарламадағы жоспардың басым бөлігіне қаладағы асфальт төселмеген 20 пайызға жуық көшелерге тегістеу және абаттандыруға көңіл бөлуді жөн санадым. Бәрі қаржыға келіп тірелгенімен, жергілікті кәсіпкерлерден де қолдау қажеттігін түсінемін. Мәселен, қаладағы мешіттің айналасы түнде тас қараңғы. Жарық шамдар орналастырған жөн деп ойлаймын. Сондай-ақ тұрғындардың көпшілігінің өтінішін қанағаттандырып, басқа да көшелерді қалаға кіреберіс тұстарды жарықтандыруға көңіл бөлмекпін», – дейді Фархат Ертайұлы.Крупская, Островский атауларынан ажырай алмай келеміз...
Ауыл әкімінің назарына іліккен тағы бір күрделі мәселе – қала көшелері мен нысандарының әлі де болса ескі атауларының сақталып қалғанында. Айтуынша, қаланың 80 пайыз көшесі әлі бұрынғы кеңестік дәуірдегі атауларынан әлі арыла алмаған. Тіпті, білім ордаларының да атауы Кеңес Одағындағы тұлғалардың есімімен аталып келеді. «Көңілге қаяу салатын жайлардың бірі қаламыздағы көшелердің басым бөлігі, дәлірек айтсам 80 пайыздан астамы ескі орысша атаудан ажырамай келеді. Комсомольская, Трудовая, Островский деген әлдеқашан ескірген көше атауларын қазақшыландырсақ деген ойым бар. Сондай-ақ қаладағы 3 мектептің екеуінің атауы әлі Крупская, Островский есімімен аталады. Алда қала тұрғындарымен жиын өткізіп, осы мәселені күн тәртібіне қойсам деген ойым бар», - дейді Державин әкімі.«Қызмет көрсету саласын қолға алмақпын»
Жаңа әкім қаладағы қызмет көрсету саласының дамуына да көңілі толмайтынын ашық айтты. Осы орайда кәсіпкерлге, әсіресе мемлекеттік бағдарлама арқылы грант иеленген жас кәсіпкерлерге осы бағытқа назар аударғанын қалайтынын жеткізді. «Жасыратын несі бар, қалада қызмет көрсету саласында ақсап тұрған жайлар бар. Киім тігу, тамақ ішетін орындар, тіпті қарапайым шаш алатын орындар жоқтың қасы. Сапасы төмен. Жақында 8 жас кәсіпкер арнайы кәсіптік білім алып, грант жеңіп алды. Осындай жас әрі білікті мамандарға қызмет көрсету саласында өз ісін ашуға кеңес беремін», – дейді Фархат Байқасов. Жаңа сайланған әкім елде тұңғыш рет ұйымдастырылған ауыл әкімдерінің халықтың сайлау арқылы өткенін толықтай қолдайтынын жеткізді. «Әрине, әкімдердің бұрынғыдай жоғарыдан тағайындалмай сайлануы халықтың сенімін арттыра бастады. Әрі әкімдер де халық сайлағандықтан, жауапкершілікті көбірек сезінді деген ойдамын. Сондықтан да сайлаудың осылайша өткізілгенін толықтай қолдаймын», – дейді Фархат Ертайұлы. Біз де елдің жүгін арқалап, ірі мақсатты жүзеге асыруды көздеген әкімнің алдағы жауапты істеріне сәттілік тіледік.Абзал АЛПЫСБАЙҰЛЫ, Ақмола облысы