Білім және ғылым министрі халықаралық Олимпиада жүлдегерлерімен кездесіп, Президенттің атынан алғысхат табыстады.
Биыл ірі халықаралық жарыстарда оқушылар 26 медаль жеңіп алды. Оның ішінде 2 алтын, 13 күміс және 11 қола бар. Нәтижесінде, кейінгі жылдардағы рекорд жаңарған. «Дарынды балаларды қолдау мәселесіне келетін болсақ, қазір ел Президенті Қасым-Жомарт Тоқаевтың тапсырмасына сай министрлік бұл бағытта жүйелі және кешенді шешімдер әзірлеп жатыр. Олимпиада қатысушыларының мұғалімдеріне, ата-аналары мен жаттықтырушыларына тағы да алғыс айтқым келеді. Сіздердің мұндай нәтижелерге қол жеткізуде еңбектеріңіз орасан зор», – деді А.Аймағамбетов. Кездесуге қатысқан балалар жеңіске жету жолындағы қызықты оқиғаларымен бөлісіп, министрге ұсыныстарын айтты. Сондай-ақ олар жаттықтырушыларымен бірге өздерін одан ары дамыту жайын талқылады. Кездесу соңында Олимпиада жүлдегерлеріне Мемлекет басшысының атынан алғысхат табысталды. Сонымен бірге жаттықтырушылардың да еңбегі ескерілді. Бұған дейін министрдің атынан 3 мың дарынды баланың ата-аналарына алғысхат жіберілген.А.АЙДАРҚЫЗЫ