Қазақстан әйелдер құрамасының капитаны Ярослава Шведова US Open турнирінде қарсыласына есе жіберді.
Дүниежүзілік рейтингте 452-орында тұрған Я.Шведова алғашқы айналымда әлемнің 99-ракеткасы, италиялық Ясмин Паолинимен кездесті. Бұл кездесуде италиялық теннисші 6:3, 6:4 есебімен жеңіске жетті. Я.Паолини 1 сағаттан астам уақытқа созылған бәсеке барысында 1 эйс жасап, 7 брейк-пойнттың алтауын өз есебіне жазды. Я.Шведова болса 4 эйс, 4 брейк (6 брейк-пойнт) жасады. Осылайша, АҚШ ашық чемпионатында жекелей сынға қатысып жатқан төрт теннисшіміздің үшеуі жарыс жолын аяқтады. Токио Олимпиадасында 4-орын алған Елена Рыбакина келесі кезеңге өтті. Сондай-ақ 31 тамыз күні ерлер арасында Қазақстанның бірінші ракеткасы Александр Бублик германиялық Янник Ханфманмен кездеседі. Зарина Дияс америкалық Аманда Анисимовамен сынға түседі.А.ЖОЛДАС