Биыл жаңа оқу жылы қарсаңында Алматы облысында бірнеше жаңа мектеп салынып, оқушылар үшін есігін айқара ашты. Солардың бірі – бүгінгі күн талабына сай тұрғызылған заманауи білім ошағы Панфилов ауданына қарасты Аққұдық ауылында.
Аудан әкімдігі хабарлағандай, бұған дейін қолданыста болған мектеп 2020 жылғы желтоқсан айында апатты деп танылған. 120 орынға арналған жаңа ғимарат құрылысын «Нұр-Шапағат Құрылыс» ЖШС жүргізді. Екі жылға кепілдікпен салынған мектеп барлық материалдық-техникалық жабдықпен толық қамтылған. Жалпы ауданы 2 736,84 шаршы метрді құрайтын ғимаратта 126 оқушыға 28 ұстаз сабақ береді. Аудан әкімі Талғат Өмірәлиевтің айтуынша, жыл сайын ауданда кезек-кезегімен 2-3 мектептен жаңартылып тұрады. Биылдың өзінде 2 жаңа мектеп салынып жатыр. Кейбір білім ғимараттарында күрделі жөндеу жұмыстары жүргізілген. Аққұдықта жаңа мектептің кілтін табыстау – жергілікті тұрғындар үшін қуанышты жаңалық. Жаңа білім ошағының табалдырығын аттаған оқушылардың әсері тіптен керемет. – Мектептің ескі ғимаратында спортзалы болмаған. Жаз айларында сыртта жаттығып жүрдік. Ал жаңа мектепте барлығы бар. Спортты серік еткендерге жол ашылды. Басқа да мүмкіндіктер қарастырылған. Оқушылардың қалаған үйірмесіне барып, оқып-үйренуіне, бос уақыттарын пайдалы етіп өткізуіне толық жағдай жасалған, – дейді қуаныштан жүздері бал-бұл жанған балалар. Облыс орталығынан шалғайда, шекаралы аймақта орналасқан Панфилов ауданында аудан орталығынан алыста жатқан елді мекендердегі мектептер де біртіндеп жаңарып жатыр. Қазір екі нысанда жөндеу жұмысы басталыпты. Басқұншы ауылындағы 300 орынды және Қорғас ауылындағы орта мектептерге күрделі жөндеу жұмысы жүргізілу үстінде. Сондай-ақ облыс бюджетінен Кіші шыған ауылындағы мектептің жөндеу жұмыстарының жобалық-сметалық құжаттамасына қаражат бөлініп, конкурс жарияланды. Келесі жылы тағы екі мектеп күрделі жөндеуден өтеді деп жоспарланған. Аудан мектептерінде 27 100 оқушы білім алады. Жалпы, бүгінде Алматы облысында 33 мектеп салынып жатыр. Биыл осылардың 9-ы және 1 қосымша ғимарат қолданысқа беріледі. Оның ішінде 1 қыркүйек күні Қарасай, Іле, Ескелді және Панфилов ауданында 6 жаңа мектепте алғаш рет алғашқы қоңырау соғылады. Жыл соңына дейін тағы 3 жеке мектеп қолданысқа берілмек.Болат АБАҒАН, Алматы облысы