Бұл жайында Білім және ғылым министрі Асхат Аймағамбетов мәлімдеді. Ол енді халықаралық зияткерлік олимпиадалардың жеңімпаздары біржолғы ақшалай сыйақы алатынын жеткізді. Бұл ретте алтын медаль иегерлеріне – 1 500 АЕК (4 млн 375,5 мың теңге), күміс – 1 000 АЕК, қола 500 АЕК көлемінде сыйақы беру жоспарлануда.
Біржолғы ақшалай сыйақы халықаралық олимпиадалардың жеңімпаздарын дайындаған педагог-тәлімгерлерге ұсынылмақ.
«Халықаралық олимпиадалар жеңімпаздарын қолдаудың басқа да тетіктері болады: олар конкурсқа қатыспай-ақ, грантпен ЖОО-ға түсе алады, бұл мәселе заңнамалық түрде реттеледі», – деді министр.
Осы шараларды жүзеге асыру үшін «Білім туралы» заңына толықтырулар енгізілмек. Атап айтқанда, жалпы білім беретін пәндер бойынша халықаралық олимпиадалардың жеңімпаздары мен жүлдегерлерін, олардың жаттықтырушыларын көтермелеу қағидаларын бекіту министрліктің тікелей құзыретіне кіретін болады.
Айта кетейік, биыл ірі халықаралық жарыстарда оқушылар 26 медаль жеңіп алып, рекордты жаңартты. Шәкірттер ел қоржынына 2 алтын, 13 күміс және 11 қола медаль салды. Президент өз Жолдауында дарынды балаларды жан-жақты қолдауды тапсырды.
Елдос СЕНБАЙ
